Pas kreut të PAA-së Agron Duka, kreu i PD-së, Lulzim Basha, ka gjetur dakordësinë dhe me dy aleatë të tjerë për listat e deputetëve në zgjedhjet e 25 Prillit.
Kryetari i LZHK, Dashamir Shehi, mësohet se do të renditet brenda 10 emrave të parë në listën e kandidatëve të PD për Qarkun e Tiranës, ndërsa në zgjedhjet e fundit parlamentare, ai renditej i 11.
Ndërkohë, në Qarkun e Shkodrës do të kandidojë me listat e PD-së, kryetari i PDK-së, Nard Ndoka. Mësohet se bazuar në marrëveshjen e arritur, Ndoka do të jetë mes 4 emrave të parë në listën e kandidatëve.
Të dyja partitë që ata drejtojnë LZHK dhe PDK do të kenë kandidatë dhe në qytete të tjera të vendit, por jo në pjesën e sigurt të listave.
Gjithashtu raportohet se Vangjel Dule do të kandidojë në një vend të sigurtë në qarkun e Vlorës, ku përfshihet edhe Himara. Por në anën tjetër PBDNJ do të ketë kandidatë të saj, brenda listës së PD-së, në qarqet Korçë dhe Gjirokastër.
Tashmë ka mbetur arritja e marrëveshjes me PDIU e Shpëtim Idrizit dhe PR-në e Fatmir Mediut.
Idrizi mësohet se ka kërkuar të jetë në listën e sigurtë në qarkun e Fierit, por njëherazi kërkon një vend të sigurtë në listën e kandidatëve për Tiranën, ku pritet të kandidojë Mesila Doda.
Ndërkohë, Fatmir Mediu, kërkon disa vende të sigurta në listat e kandidatëve të qarqeve, përveç emrit të tij, që është ofruar për Tiranën.
Kështu raportohet se PR kërkon kandidatë të sigurtë në 4 qarqe.
Mediu tha dje gjatë një dalje televizive se në një koalicion marrëdhëniet duhet të jenë reciproke, dhe se Partia Republikane ka potencial që të marrë më shumë se 1 deputetë në zgjedhjet e ardhshme.
Mediu tha se vetëm për qarkun e Tiranës, PR pret që të fitojë dy mandate deputetësh, ndërkohë që ka pretendime dhe në qarqe të tjera të vendit.
Pikërisht kjo kërkesë e tij për më shumë, duket se po zvarrit arritjen e një marrëveshje përfundimtare me Bashën, dhe në rast se kjo nuk ndodh do të kishter një fragmentarizim të koalicionit opozitar.
Sa i takon LSI-së ajo pritet që të dalë me listë të veçantë në disa qarqe të vendit, pasi pretendimet e saj janë padyshim më të mëdha se të të gjitha partive të tjera të koalicionit opozitar.
