Një ngjarje e rëndë ka ndodhur në një familje shqiptare në Rodos të Greqisë, ku djali 12 vjeçar plagosi tre herë me thikë motrën e tij 11 vjeçare.
Dy fëmijët jetojnë vetëm me babain e tyre pasi nëna ka ndërruar jetë 9 vite më parë pas një sëmundje të rëndë.
Babai ka mbetur i vetëm dhe punon në ndërtim për të siguruar të ardhura për familjen e tij dhe përpiqet të gjejë kohë për të rritur fëmijët. Por fatkeqësisht nuk arriti të shmangte ngjarjen e rëndë që erdhi si pasojë e zemërimit.
Para prokurorisë, babai tha se nuk kishte vënë re asnjëherë sjellje të tillë tek djali. “Ai nuk ka treguar ndonjëherë shenja të tilla agresioni” ishte fraza e saktë që ai përdori para prokurorit.
Avokati i tij, Stelios Alexandris, duke folur për protothema.gr, deklaroi se kjo ngjarje e pabesueshme ndodhi për një arsye të parëndësishme dhe qesharake. “Të dy të miturit, vëlla e motër u grindën se kush do ta priste sallatën në tryezën e familjes, duke pritur që babai i tyre të kthehej nga puna,” tha avokati.
Fëmija mori thikën dhe i bëri tre plagë të thella motrës, e cila u transportua me urgjencë në Departamentin e Urgjencave të spitalit të Përgjithshëm të Rodosit për të marrë ndihmën e parë.
Vajza është në një gjendje shoku dhe shprehu dëshirën të lërë jo vetëm shtëpinë e saj, por edhe Greqinë dhe të vendoset në Shqipëri në shtëpinë e tezes së saj. Por i shokuar ka ngelur edhe vëllai i saj, i cili u përpoq të justifikonte veten duke thënë se gjithçka ishte bërë për një shaka dhe se ai nuk kishte ndërmend ta dëmtonte atë. Me urdhër të prokurorit, sjellja e tij do të vlerësohet nga psikologët.
Babai i dy fëmijëve ka pranuar vendimin e vajzës së tij për të lënë Greqinë dhe për të lëvizur në Shqipëri në shtëpinë e të afërmve të tyre.
