Policia e Shtetit vijon të gjobisë qytetarët për shkak të mungesës së maskave mbrojtëse, thyerjes së orës policore, apo organizimin e aktiviteteve në kundërshtim me protokollet e sigurisë.
Policia bëri të ditur se ka gjobitur 393 qytetarë për mungesën e maskës.
Gjithashtu është ndëshkuar me 1.000.000 lekë një subjekt që ushtronte aktivitetin në kundërshtim me protokollet e sigurisë.
Masë administrative është vendosur edhe për 23 shtetas që u konstatuan duke lëvizur në këmbë pas orarit të ndalimit të lëvizjes.
Gjatë kontrolleve janë shoqëruar në ambientet e Policisë në të gjithë vendin, 5 shtetas që nuk kanë pranuar t’i tregojnë punonjësve të Policisë dokumentin e identifikimit, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.
