Presidenti Ilir Meta tha se do të kthente në Kuvend ligjin mbi ndryshimet në Kodin Zgjedhor të miratuara nga Kuvendi dhe përmes të cilave ndalohen koalicionet parazgjedhore.
Meta tha se në rast se do të ketë kërkesë nga subjekte të caktuar politike, mund t’i drejtohet edhe Komisionit të Venecias për Kodin Zgjedhor.
“Do të kthehet në parlament dhe do të jetë një kthim i argumentuar, brenda afateve Kushtetuese”, tha Meta.
Ai kërkoi nga mazhoranca të reflektojë dhe zbatojë marrëveshjen e 5 qershorit, pasi në të kundërt Shqipëria do të shkojë në referendum në datën 25 prill kur dhe zhvillohen zgjedhjet.
Ai thotë se ka plane pa fund, por askush s’duhet të dalë kundër zotimeve pasi Presidenti mund të mbajë një referendum që do jetë më i madhi nga koha e Skënderbeut.
Meta qartëson se ai do të garantojnë që Shqipëria nuk do të bjerë në humnerën ku duan ta shtyjnë forcat antishqiptare.
“Duhet të reflektojmë të gjithë dhe mos e kthejmë 25 prillin në referendum. Ose do e kthej në referendum, më i madhi që nga koha e Skënderbeut. Këtë gjë nuk e ndal dot më askush. Të gjithë të bëhen pjesë dhe askush mos dalë kundër ose do ketë kundër gjithë popullin shqiptar, të majtë e të djathtë.
Presidenti do bëjë çdo gjë që të respektohet 5 qershori. Ata do vendosin që ta çojnë në referendum? Patjetër. Me gjithë demokratët, socialistët, ballistët, pa parti, që do i qëndrojmë amanetit të Skënderbeut. Sic ka thënë Fan Noli, do jetë më i gjalli ndër të gjallët.
Presidenti ka plane pa fund, për të garantuar që Shqipëria mos bjerë në një humnerë ta shtyjnë forcat antishqiptare. Kthimi do jetë shumë i mirë argumentuar nga ana kushtetuese, standardet e Venecias, OSBE, KiE, sepse do ketë kthim të argumentuar, dhe një kthim që do ndiqet nga partnerët ndërkombëtarë”, tha Meta.
Kreu i Shtetit ka komentuar edhe një deklaratë të bërë në Kuvendin e Shqipërisë nga deputeti i PS-së Bujar Çela, sipas të cilit Presidenti duhet të izolohej nga Prokuroria e Përgjithshme.
Meta sfidoi socialistët, ndërsa tha se Presidenti do të jetë në Presidencë, ndërsa iu sugjeroi që deputetët mund t’i bëjnë thirrje të gjithë prokurorëve në botë dhe policie po ashtu.
“T’u bëjnë thirrje të gjithë prokurorëve dhe të gjitha policive në botë, s’e presidenti këtu është gjithmonë. Dhe të shohim se kush do të izolojë presidentin. Zero shans! Izolimi i Shqipërisë nga Europa është qëllimi. Presidentin këtu e kanë. Le të vijnë që të zënë këtë institucion. Unë i kam thënë të gjithë Shqipërisë dhe Botës se qëllimi është zhytja e Shqipërisë, izolimi.”, tha Meta.
“Presidenti ka këto pyetje e fakte; në 2006 kryeministri Sali Berisha pas rrotacionit që erdhi në Shqipëri, ai shpartalloi bandat dhe goditi kriminalin dhe mbylli marrëveshjen e stabilizim asociimit me BE. Kjo marrëveshje do të ishte miratuar 3 vite më parë. Kjo marrëveshje do miratohej në dhjetor të atij viti dhe erdhi Romano Prodi dhe i bëri thirrje kryeministrit që mos të pengonte reformat. Në 2001 nuk ekzistojnë as Serbia as Mali i zi. Berisha e mbylli këtë marrëveshje, Serbia mbas tij. Mali i Zi i çeli negociatat, po ashtu dhe Serbia në 2014.”, pohoi ai.
