Damian Gjiknuri, përfaqësues i PS-së në Këshillin Politik, i ka lënë afat opozitës deri të premten për të paraqitur propozimet e saj lidhur me pragun kombëtar zgjedhor, afatet e paraqitjes së listave unike nga koalicionet, si dhe propozimin mbi mënyrën se si do votohen kandidatët në kushtet e listave të hapura, duke respektuar kuotat gjinore.
E ndërsa opozita ne përfaqësuesit e saj kërkoi konsultime me ODIHR, Gjiknuri tha se kërkesa ishte e çuditshme përsa kohë rekomandimi bazë i ODIHR për depolitizimin e komisioneve zgjedhore nuk u pranua.
Gjiknuri ka vënë theksin te ndryshimet Kushtetuese, për të cilat tha se ato janë në fuqi.
“Ndryshimet kushtetuese tashmë janë në fuqi. I doni apo nuk i doni kjo është tjetër çështje. Kemi Kushtetutën në fuqi dhe detyrimin për ta reflektuar në Kodin Zgjedhor. Ju lutem, ju ftoj që në ditët e ardhshme, deri të premten të sillni propozimet tuaja për: 1) pragun kombëtar zgjedhor, 2) afatet e paraqitjes së listës unike nga aleancat dhe 3) si do kryhet aspekti procedurial i votimit për kandidatët në kushtet e listave të hapura duke ruajtur kuotat gjinore. Nuk duhet humbur kohë. Duhet t’i japim bazën ligjore të plotë institucioneve që të përgatisin zgjedhjet.
Kërkesa juaj për të kërkuar në këtë faze mendimin e ODIHR është e çuditshme kur jeni ju që na detyruat që të bëjmë një marrëveshje në 5 qershor, e cila binte në kundërshtim me rekomandimin kyç të ODIHR, që ishte depolitizimi i administratës zgjedhore.
Atëherë nuk donit të pyesnit për ODIHR, ndërsa tani qenkeni kujtuar t’i kërkojmë mendim! Ne pranuam atë çka kërkuat ju në 5 qershor dhe firmosëm bashkërisht pikërisht për t’ju plotësuar juve kërkesat. Gjithsesi e kemi firmosur atë marrëveshje dhe i kemi qëndruar asaj plotësisht,” tha Gjiknuri.
