Bojken Abazi, drejtuesi i Vetëvendosjes në Shqipëri, i ftuar në edicionin e mbrëmjes në SYRI TV, tha se “ne jemi për proporcional kombëtar me lista të hapura siç është në Kosovë”.
Megjithatë, Abazi tha se nuk është e thënë që ky sistem të ndikojë gjithmonë për mirë, sikur është parë edhe në Kosovë.
“Mendoj se kësaj çështje po i jepet më shumë rëndësi sa meritojnë. Na duhet një rikthim te bazat e politikës, te programi, te mënyra se si do të dalim nga kriza,” tha Abazi.
“Propozimet për ndryshimet kushtetuese duan të pengojnë partitë e vogla dhe t’ua bëjnë jetën të vështirë,” tha ai, duke ngritur shqetësimin e pragut kombëtar. “Mbase u intereson partive të mëdha që të mos punojnë në këtë drejtim, të mos lejojnë konkurrencën e programeve të reja”.
“Shqipëria ka nevojë për alternativë të re. Unë nuk kam asnjë garanci që me hapjen e listave nuk do dalin aty kandidatë problematikë.
Me këto propozime për ndryshime kushtetuese edhe tentohet të dëmtohet opozita, edhe të pengohen alternativat e reja.
Duhet të kthehemi te programi, duhet të kthehemi te morali politik. Uroj t’i jepet fund sa më shpejt këtij diskutimi, për të diskutuar për gjëra që janë thelbësore për vendin,” tha Abazi.
I pyetur nëse VV do marrë pjesë në zgjedhjet e ardhshme, ai tha se nuk është marrë akoma një vendim. “Nuk kemi marrë vendim, kështu që nuk mund të themi se me kë do jemi në koalicion”.
