Deputeti i Partisë Demokratike, Oerd Bylykbashi, ka deklaruar se presidenti Bajram Begaj, me dekretimin e datës për zgjedhjet e pjesshme lokale, ka shkelur Kushtetutën.
Gjatë fjalës së tij në Komisionin për Çështjet Ligjore dhe Administratën Publike, Bylykbashi u shpreh se dekreti nuk është thjesht një gabim, por një vendim i marrë me urdhër të kryeministrit Edi Rama, dhe se ai është nul deri në një vendim të Gjykatës Kushtetuese (GJK) për ankimimin e Erion Veliaj lidhur me shkarkimin nga detyra.
“Data e dekretuar është nul sa kohë ka një çështje në GJK për t’u shqyrtuar. Presidenti mund të bëjë pirueta sa të dojë, por shkelja që ka bërë duke nxjerrë dekretin është në kundërshtim me Kushtetutën. Pa u shqyrtuar çështja nga GJK nuk mund të ketë një proces të rregullt”, tha Bylykbashi.
Deputeti shtoi se veprimi i presidentit për dekretimin e datës, duke pretenduar se nuk hyn në kushtet e nenit 115, është veprim me vetëdije, dhe se kjo mbetet për t’u parë nga Gjykata Kushtetuese.
