Bashkimi Europian hoqi sot Malin e Zi dhe Serbinë nga lista e vendeve, udhëtarët e të cilëve janë të mirëpritur në territorin e saj, e reduktuar në 12 emra.
Prania e Kinës në listë mbetet me kushtin e reciprocitetit.
Kjo listë,e hartuar me vështirësi 15 ditë më parë, është e bazuar veçanërisht në kriteret epidemiologjike dhe i nënshtrohet një rishikimi çdo 15 ditë.
BE siguron një listë të vendeve për të cilat kufizimet e udhëtimit në kufijtë e jashtëm duhet të hiqen për banorët e këtyre vendeve jashtë Bashkimit Europian.
Udhëtimet “jo thelbësore” drejt Europës janë ndaluar që prej 17 marsit, në kuadër të luftës kundër përhapjes së pandemisë. Rekomandimi i miratuar nuk është detyrues. Shtetet anëtare janë përgjegjës për udhëtarët që do të lejojnë të hyjnë në territorin e tyre.
Megjithatë BE po bën përpjekje për t’u koordinuar, për shkak të qarkullimit të lirë në hapësirën Shengen.
Serbia dhe Mali i Zi kanë regjistruar rritje shqetësuese të rasteve me koronavirusin e ri këto ditët e fundit.
Mbeten të përjashtuar nga kjo listë SHBA-ja, vendi më i prekur në botë nga pandemia, që ka regjistruar më shumë se 50 000 raste në ditë që prej korrikut dhe më shumë se 140 000 të vdekur, por gjithashtu dhe Brazili me rreth dy milionë raste dhe më shumë se 70 000 të vdekur, Rusi si dhe India, ku pandemia ka shpërthyer që prej fillimit të korrikut.
Dymbëdhjetë vendet në listë janë Algjeria, Australia, Kanadaja, Gjeorgjia, Japonia, Maroku, Zelanda e Re, Ruanda, Koreja e Jugut, Tajlanda, Tunizia dhe Uruguaji.
