Punonjësi i Kuvendit emërohet në krye të Kadastrës së Vlorës/ Prezantimi nga Lame

Ani Binaj është drejtori i rradhës i emëruar në krye të Kadastrës së Vlorës, duke zëvendësuar Jurgen Pilkapin, i cili qëndroi në detyrë vetëm dy javë.

Prezantimi i Binajt u bë nga Drejtori i Përgjithshëm i Agjencisë Shtetërore të Kadastrës Artan Lame.

“Mjafton të themi që kemi vënë në vijë çështje edhe më të vështira. Në këto 6 apo 8 muaj, Vlora po vuan një kalvar problemesh që vazhdon prej 30 vjetësh. Këtë nuk e them për të hequr përgjegjësitë nga vetja apo qeveria. Të gjithë kemi fjetur sipër kësaj situate kaotike. Sot kemi patur kurajën që ta hapim dhe të themi se këto janë problemet për Vlorën”, tha Lame.

LEXO EDHE  Nëna me koronavirus sjell në jetë fëmijën në maternitetin 'Koço Glozheni'

Ndërsa kreu i ri i kadastrës së Vlorës në fjalën e tij u shpreh se ka punuar pranë zyrave vendore në Kuvendin e Shqipërisë, në sektorin e marrëdhënieve me publikun, ku është njohur nga afër me problematikat e qytetarëve.

“Një pjesë më e madhe ka pasur të bëjë me pronat. Për punën e Kadastrës në Vlorë, të flasim veprat dhe jo fjalët. I ftoj të gjithë qytetarët që të aplikojnë tek e-albania”, tha ai.

Në 6 muajt e fundit Kadastra e Vlorës ka ndryshuar 7 drejtorë, të gjithë të dorëhequr. Në disa raste drejtorët e emëruar kanë qëndruar në detyrë më pak se dy javë.