Nga Boldnews.al
Një vendim absurd i qeverisë “Rama”, i miratuar së fundmi, detyron institucionet ligjzbatuese, përfshirë Policinë së bashku me Operacionin “Forca e Ligjit”, Prokurorinë dhe institucionet e Vetingut, të paguajë tarifa për të marrë informacion zyrtar në Agjencinë e Kadastrës.
Vendimi i Këshillit të Ministrave nr. 389, dt. 13.05.2020, nga njëra anë rrit kostot në mënyrë të habitshme për institucionet shtetërore investiguese dhe nga ana tjetër vonon proceset hetimore, në rastet kur strukturat publike nuk do të jenë në gjendje të paguajnë faturat për llogari të Kadastrës.
Qeveria ka vendosur që, për të paktën 9 dokumenta që administrohen nga Kadastra, Policia e Shtetit, Prokuroria, strukturat e Vetingut, gjykata dhe deklarimi i pasurive, duhet të paguajnë tarifa që variojnë nga 700 lekë deri në 2000 lekë të reja për çdo dokument.
Referuar morisë së madhe të veprimeve hetimore mbi pasuritë që zhvillohen nga institucionet ligjzbatuese, fatura financiare që ato duhet të arkëtojnë në llogarinë e Agjencisë së Kadastrës pritet të jetë shumë e lartë.
Vendimi i qeverisë “Rama” ka kaluar “në heshtje”, ndërkohë që përfaqësuesit e saj i janë shmangur shpjegimeve publike mbi arsyet e këtij vendimi.
Qeveria “memece” për tarifat
Ministrja e Drejtësisë, Etilda Gjonaj, në cilësinë e përfaqësueses së Këshillit të Ministrave, parashtroi një sërë rekomandimesh ndaj Prokurorisë së Përgjithshme për rritjen e efikasitetit në luftën kundër krimit të organizuar, në një takim on-line të zhvilluar këtë mesjavë.
Por, Gjonaj iu shmang një fakti të përmendur nga anëtarja e Këshillit të Lartë të Prokurorisë, Esmeralda Cami, e cila i kujtoi ministres se një vendim i fundit i Këshillit të Ministrave ka vendosur tarifa për institucionet ligjzbatuese për marrjen e dokumentave që i nevojiten hetimit, në Agjencinë e Kadastrës.
Ky diskutim, megjithëse kaloi tangent, dëshmoi se qeveria nuk është konsultuar dhe nuk ka diskutuar paraprakisht me institucionet ligjzbatuese, para se të merrte vendimin për tarifat mbi dokumentat e Kadastës.
Faturat për OFL, prokurorinë dhe Vetingun
Komisioni Europian i ka vendosur Shqipërisë 15 kushte para se të caktojë një datë për hapjen e negociatave për anëtarësim në Bashkimin Europian.
Ndër kushtet kryesore janë lufta kundër krimit të organizuar e korrupsionit dhe vetingu i gjyqtarëve e prokurorëve.
Nga ana tjetër, Moneyval e ka renditur Shqipërinë në të ashtëquajtur zonë “gri”, e cila përfshin vendet që kanë nevojë për monitorim të rreptë sa i përket pastrimit të parave.
Qeveria shqiptare ka deklaruar se është e vendosur të përmirësojë situatën me pastrimin e parave, duke forcuar mekanizmat për luftën kundër pastrimit të parave.
Pjesë e këtyre mekanizmave është edhe struktura e diskutueshme “OFL” (Operacioni “Forca e Ligjit”), si edhe deklarimet e shpeshta publike për mbështetje të vazhdueshme të strukturave hetimore dhe institucioneve të rivlerësimit.
Por, përtej qëndrimeve deklarative, vendimi i Këshillit të Ministrave për tarifikimin institucioneve ligjzbatuese për të siguruar dokumenta nga Kadastra, shkon në të kundërt të forcimit dhe rritjes së shpejtësisë së hetimeve pasurore.
Qeveria, nëpërmjet vendimit nr.389, ka vendosur të caktojë tarifa për institucionet publike, në rastet e mëposhte:
– Regjistri i sekuestros mbi pasurinë, 1000 lekë
– Lëshim kopje të fragmentit të hartës kadastrale, 1000 lekë
– Lëshim kopje të fragmentit të planshetës së hartës kadastrale, 5000 lekë për planshetë
– Lëshim kopje të kartelës së pasurisë, 1000 lekë
– Kopje të vërtetuara të dokumentave tekniko-ligjorë, 200 lekë për faqe
– Konsultim i kartelës së pasurisë së paluajtshme, 700 lekë
– Verifikim on-line i gjendjes juridike të pasurisë, 600 lekë
– Informacion zyrtar i pasurisë për individët dhe personat juridike, 2000 lekë
– Dhënie informacioni koordinativ për pasuritë e paluajtshme, 1000 lekë;
Mënyra e pagesës
Vendimi i Qeverisë i 13 Majit 2020 përfshin tarifa për një total prej 65 shërbimesh që kryen Agjencia e Kadastrës.
Në rastet e shërbimit për qytetarët dhe subjektet private, VKM parashikon që tarifat të kryhen para marrjes së shërbimit.
Ndërsa, për institucionet hetimore, Vendimi Këshillit të Ministrave ka parashikuar një “tolerim”-pagesa do të kryhet në muajin pasardhës të dhënies së dokumentacionit.
Vendimi, i cili ka hyrë në fuqi në fillim të muajit Qershor 2020, ka sjell një ngërç tek institucionet ligjzbatuese, strukturat e Vetingut dhe ato të deklarimit të pasurive.
Këto institucione nuk kanë fond të parashikuar për këtë tarifim, i cili hyri në fuqi në mes të vitit buxhetor.
Për këtë arsye, institucionet ligjzbatuese do të jenë të detyruar që të kërkojnë fonde shtesë nga Qeveria, me qëllim që të paguajnë tarifat e caktuara për marrjen e dokumentacionit.
Në rast se qeveria nuk pranon të shtojë fondin apo vonon shtesën e buxhetit, institucionet ligjzbatuese mund të përfshin në kolaps financiar ose nuk do të arrijnë të sigurojnë dokumentacionin në Agjencinë e Kadastrës, duke bllokuar në këtë mënyrë edhe veprimtarinë hetimore.
