Gazetari i News 24, Erjon Skëndaj, ka bërë një denoncim të fortë sot lidhur me përhapjen e Covid-19 te bluzat e bardha dhe më pas te pacientët që marrin trajtim mjekësor në QSUT.
Duke iu referuar burimeve të sigurta të tij, gazetari theksoi se nga data 20 deri në 25 maj, në QSUT, personeli mjekësor nuk ka pasur mjetet mbrojtëse, maska dhe dorëza, çka duket se përbën edhe shkakun kryesor të infektimit të bluzave të bardha dhe pacientëve.
“Ka pasur mungesë të mbrojtjes personale, doreza dhe maska. Janë 26 persona të prekur te mjekësia interne dhe 11 persona të prekur te hematologjia. Ministria e Shëndetësisë kurrë nuk thotë se sa bluza të bardha, personel mjekësor dhe pacientë janë të prekur. Ata që e paguajnë më rëndë janë pacientët, që kanë nga 1 ose 2 sëmundje bashkëshoqëruese dhe infektivimi nga koronavirusi, i agravon gjendjen shëndetësore”, tha gazetari në një lidhje direkte me News 24.
Prej disa ditësh QSUT u kthye në një vatër të rrezikshme të përhapjes së koronavirusit, duke rritur ndjeshëm numrin e rasteve ditore. Pavarësisht kësaj, Ministria e Shëndetësisë fajëson qytetarët lidhur me mosrespektimin e masave, apo bizneset, ndërsa nuk përmend përhapjen e Covid-19 në spitalin qendror, që u kthye në një burim infeksioni.
