Nga Boldnews.al
Presidenti i Dhomës Amerikane të Tregtisë Enio Jaço e ka konsideruar korrupsionin në Shqipëri si tejet shqetësues për biznesin. Duke iu referuar anketave ai thekson se problemi i parë që ata raportojnë janë monopolet dhe konkurrenca e pandershme.
. Këtë qëndrim e mbajti në një intervistë për Zërin e Amerikës. Më shumë se një qëndrim personal është problem i shfaqur nga të gjithë bizneset që janë anëtarë të Dhomës Amerikane të Tregtisë.
“Problemi i korrupsionit është i përhapur, ne duhet ta shikojmë në sy dhe ta trajtojmë. Është momenti për të kuptuar nëse forcat politike apo forcat influenciale në Shqipëri, kanë arritur një moment që duan ta luftojnë vërtet korrupsionin apo jo. Unë mendoj që janë dy elemente kryesore shumë të rëndësishme”, shprehet ai.
Ka kaq kohë që bizneset e mëdha të huaja, por edhe një pjesë e mirë vendase ankohen për konkurrencë të pandershme. Vetëm pesë kompani që kanë marrë statusin e “oligarkëve” janë të privilegjuarit e pushtetit. Çdo tender i madh publik, çdo koncesion kalon në pak duar, ku firma përfundimtare për qindra milionë euro bën xhiron e “detyrueshme” nga zyra e kryeministrit Edi Rama.
Pikërisht në atë zyrë ku shpesh ambasadorja e re amerikane kryen takime zyrtare, ku fokusi mbetet reforma në drejtësi, kriza politike dhe padyshim edhe korrupsioni si shkak dhe pasojë e shumëçkaje shkon keq në vendin tonë.
Kushdo që shkel në atë ambient më parë se të mrekullohet nga pikturat me dragonj të Ramës, apo sjelljet e tij prej aktori, duhet të ketë në duar raportet e korrupsionit qeveritar, dhe ankesat e shumta të bizneseve të ndershme.
Buzëqeshjet, shtrëngimet e duarve dhe deklaratat për mbështetje të qeverisë duket se nuk janë ata që bizneset presin. Në vendin tonë prej shtatë vitesh nuk ka ardhur për të investuar asnjë kompani serioze ndërkombëtare. Edhe pse janë dhënë me koncesion mbi 1.7 miliardë euro, që të gjithë kanë përfunduar në duart e pak kompanive të privilegjuara vendase, ose edhe konpani të sapokrijuara, pas së cilës janë raportuar se qëndrojnë persona të lidhur ngushtësisht me qeverinë.
