Policia e Durrësit ka shoqëruar mbi 30 persona, që janë marrë në pyetje, pas vrasjes së dyfishtë të ndodhur mbrëmjen e djeshme në zonën e Shkozetit.
Viktima nga atentati mbetën Anxhelo Avdia, 24 vjeç, dhe Dorjan Shkoza, 35 vjeç.
Ato u qëlluan me breshëri automatike nga një makinë.
Mësohet se viktimat u qëlluan teksa qëndronin në trotuar, ndërsa po konsumonin cigare.
Dyshimet e policisë janë se atentati është kryer nga vrasës me pagesë.
Nga veprimet para hetimore dyshohet se është qëlluar nga një automjet tip “Mercedes”.
Burime policore bëjnë me dije se 4 plumba e kanë kapur Shkozën në pjesën e kokës duke i shkaktuar vdekje të menjëhershme, ndërsa viktima tjetër Avdia ka marrë plumba në pjesë të ndryshme të trupit.
Raportohet se 24 vjeçari ka ndërruar jetë në spital, pa i dhënë mundësi mjekëve për t’a shpëtuar.
Ende nuk ka një pistë lidhur me atentatin, por dyshimet janë se gjithçka mund të ketë ndodhur si pasojë e prishjes së pazareve të drogës.
Dyshimet për këtë pistë kanë lindur pasi 35-vjeçari ka qenë i dënuar me 8 vjet burg për trafik të lëndëve narkotike.
Policia ka gjetur një automjet të djegur që dyshohet se është përdorur nga autorët.
