Ditën e diel për shkak të Coronavirus-it, u shtynë katër ndeshje të Serie A, ndërsa u luajtën vetëm dy sfida ato mes Genoas dhe Lacios dhe Roma kundër Lecces.
Tashmë në Itali vijnë me një vendim zyrtar, ku gjashtë takime të javës së 26-të të kampionatit do të luhen pa praninë e tifozëve.
Ndeshja më e rëndësishme që luhet me dyer të mbyllura është derbi i Italisë, Juventus-Inter. Të dielën pa tifozë do të luhen edhe Milan-Genoa, Parma-SPAL dhe Sassuolo-Brescia. Gjithashtu, të hënën Sampdoria-Hellas Verona do të zhvillohet pra praninë e tifozëve.
Gjithashtu edhe Inter-Ludogorets, në Europa League do të luhet me dyer të mbyllura. Ministri i Sporteve, Vincenzo Spadafora, e ka konfirmuar që këto ndeshje në zonat e prekura nga Coronavirus do të luhen pa tifozë, ndërkohë që do të ketë edhe takime që do të shtyhen.
Në Itali situata është bërë serioze dhe po tentohet që të shmangen sa më shumë kontaktet mes njerëzve. Nëse dikush do të ishte i prekur me Coronavirus dhe do të shkonte në stadium, atëherë përhapja e virusit do të ishte masive dhe situata do të rëndohej edhe më shumë.
