Koronavirusi ka prekur rreth 77 mijë persona në rang botëror, ndërsa numri i të vdekurve ka shkuar në mbi 2300, përfshi edhe dy shtetas italianë. Sëfundmi raportohet se numri i të prekurve në Itali ka shkuar në 29 persona.
Por cilat janë simptomat dhe si mund të ruheni nga koronavirusi?
Simptomat
Një i prekur nga koronavirusi ka fillimisht simptoma të zakonshme si dhimbje koke, rrufë, dhimbje muskujsh dhe kollë. Nëse virusi avancon edhe më tepër në trup, atëherë shfaqen simptomat më të dukshme si, temperaturë e lartë mbi 38 gradë celsius, pneumoni, vështirësi në frymëmarrje, situatë e cila çon në dobësimin e sistemit imunitar të trupit dhe që mund të çojë deri në vdekje.
Si të ruhemi
Masat kryesore që rekomandohen për parandalimin e infeksionit nga koronavirus:
-Lani shpesh duart me ujë dhe sapun ose pastrojini ato duke i fërkuar me pastrues me bazë alkooli;
-Kur kolliteni apo teshtini, mbuloni gojën dhe hundën me gropëzën e bërrylit ose shami letre. Hidheni menjëherë shaminë e letrës në koshin e plehrave dhe pastaj lani duart;
-Mënjanoni kontaktet e ngushta me këdo që ka temperaturë dhe kollë;
-Paraqituni tek mjeku nëse keni kollë, temperaturë apo vështirësi në frymëmarrje dhe raportoni historinë e udhëtimeve nëse keni udhëtuar kohët e fundit;
-Mënjanoni kontaktet me tregjet e kafshëve të gjalla në zonat që kanë koronavirus dhe parandaloni kontaktet e pambrojtura me kafshë të gjalla apo sipërfaqe që kanë qenë në kontakt me kafshët;
-Mënjanoni konsumin e produkteve të mishit të pagatuara apo gatuara jo shumë. Mishi, qumështi i papërpunuar apo organet e kafshëve duhet të trajtohen me kujdes, duke përdorur mjete mbrojtëse në mënyrë që të mënjanohet kontaminimi;
-Udhëtarët që kanë patur kontakte me raste të konfirmuara apo ekspozim direkt ndaj një burimi të mundshëm të infeksionit duhet të vendosen në observim mjekësor. Kontaktet me rrezik të lartë duhet të mënjanojnë udhëtimet për periudhën e inkubacionit deri në 14 ditë.
