Mjeku i njohur onkolog, Agim Karaj, ka reaguar lidhur me vdekjen e shtetases, Anjeza Hallvaxhi. Mjeku Karaj përmes një postimi në rrjet sqaron të gjitha procedurat dhe hapat e ndjekur në rastin e pacientes që u nda nga jeta.
Reagimi i mjekut Karaj ka ardhur pas denoncimit të familjarëve në një prej televizioneve kombëtare, të cilët e fajësojnë mjekun.
Karaj sqaron se, pas përgjigjes së analizave të biopsisë, pacientes nuk mund ti bëhej asnjë ndërhyrje tjetër.
“Gjej rastin të sqaroj opinionin publik mbi trajtimin e pacientes Anjeza Hallvaxhi, e cila ndërroi jetë para disa ditësh.
Dua të sqaroj që në spitalin Amavita punohet me përkushtim dhe humanizëm në trajtimin e pacientëve të shumtë.
Në fushën e kirurgjisë së tumoreve të gjirit jemi nga spitalet më të kualifikuara duke realizuar operacione shumë të vështira me sukses.
Në rastin konkret pacientia u paraqit në spitalin tonë në dt 16.12.2017 me diagnozë tumor glandula mammae sinister suspekt fibroadenoma me mase 3-3.5cm ovale, e lëmuar dhe e lëvizshme.
Klinikisht dhe radiologjikisht rezultonte fibroadenome, i cili është një tumor i mirë dhe për të cilin mjekimi konsiston në heqje kirurgjikale. Në dt 16.12.2017 realizohet interventi duke u hequr tumori i tëri, pa u prekur sipas protokolleve.
Materiali i hequr dërgohet për biopsi në kliniken “LDM” e profesorit të nderuar Shahin Kadare. Përgjigjia e biopsisë vjen “Fibroadenoma”.
Me këtë përgjigje klinika jonë nuk mund të bënte mjekim tjetër.
Pacientes i hiqen penjtë dhe i rekomandohet kontroll për 3 muaj. Pacientia paraqitet pas 6 muajsh dhe pasi e vizitova i rekomandova të bënte biopsinë e një gjendre nën sqetull për të parë nëse është kancerogjene.
Pacientia refuzoi dhe ne i dhamë një epikrize ku rekomanduam vizitë senologu pasi do shkonte për një mendim të dytë jashtë vendit”, shkruan mjeku në postimin e tij në rrjet.
Në vijim ai sqaron se pacientja ka shkuar në Belgjikë, ku pas analizave ka nisur kimio-terapinë, ndërsa pyet “ku është “mjekimi i gabuar nga ne”?.
