Presidenti Ilir Meta thumboi sot diplomatë të akredituar në Tiranë lidhur me qëndrimin që po mbajnë ndaj zhvillimeve më të fundit në reformën në drejtësi, veçanërisht pas ndryshimit të procedurës së betimit të anëtarëve të Gjykatës Kushtetuese.
Meta tha sot se kishte pasur një takim me ambasadoren kanadeze, e cila nuk e kuptonte situatën e krijuar, ndërsa ai i kishte thënë “ka kolegë diplomatë që kanë vite të tëra dhe nuk duan të kuptojnë”.
Presidenti nuk përmendi emra diplomatësh që nuk donin të kuptonin atë që Kreu i Shtetit e konsideron grusht shteti, por referuar kohës se kur diplomatët e vendeve kryesore kanë ardhur në Shqipëri, nuk është shumë e vështirë.
Bernd Borchardt ka marrë detyrën e Ambasadorit të OSBE-së në 2016. Gjermani që dikur ka shërbyer edhe si Ambasador i Gjermanisë në Tiranë është shpallur person “non grata” nga Kreu i Shtetit.
Luigi Soreca ka ardhur në Shqipëri në 2018, duke marrë detyrën e Ambasadorit të BE-së, ndërsa zëvendësoi në këtë pozicion Romana Vlahutin.
Duncan Norman mban detyrën Ambasadorit të Britanisë së Madhe në Shqipëri prej të paktën 2 vitesh.
Po kështu ambasadorja e Francës, Christine Vasak, ka të paktën dy vite në këtë detyrë.
Këto janë 4 diplomatët që mund të konsiderohen si më të “vjetrit” në detyrat që kryejnë në krahasim me kolegët e tyre, pasi Ambasadorët e SHBA dhe Italisë, kanë vetëm disa javë që kanë ardhur në Tiranë, sikundër ai i Gjermanisë ka vetëm pak muaj.
Nuk dihet se kujt prej 4 diplomatëve ia drejton Presidenti “thumbimin”, edhe pse dy prej tyre kanë qëndruar më të tërhequr veçanërisht përsa i takon reformës në drejtësi.
