Komediani i njohur, Julian Deda, ka reaguar përmes një postimi në rrjet lidhur me thirrjen e Presidentit Ilir Meta drejtuar shqiptarëve për të protestuar më 2 mars, mbi atë që Kreu i Shtetit e konsideron “grusht shteti”.
Deda shprehet se Meta ka harruar se është President dhe jo kryetar i ndonjë partie opozitare. Në këto kushte, Deda pyet Metën pse nuk e shpërndan Parlamentin?
“Ilir Meta ka harruar që është pak President dhe jo kryetar i ndonjë partie opozitare.
Ka harruar që ka në dorë disa mekanizma, të cilat opozita nuk i ka, si për shembull të shpërndajë Parlamentin. Pse nuk e bën? Ku është problemi këtu?”, shkruan Deda.
Rreth mesditës, në një konferencë për mediat, Presidenti deklaroi se “2 mars pasdite, në Bulevardin “Dëshmorët e Kombit”, do jetë dita kur do të nisë shpartallimi i grushtit të shtetit. Pres popullin në mbrojtje të Kushtetutës”.
Në vijim, Presidenti theksoi se nëse ky institucion është sot një kështjellë e vetme por e pamposhtur dhe e paetur e mbrojtes së Kushtetutës, nga data 2 mars ku do të firmoset dekreti i parë për shpartallim të plotë të grushtit të shtetit, në Bulevardin Dëshmorët e Kombit do bëj thirrje për të shpartalluar grushtin e shtetit.
“Ju presim pasdite në Bulevard se do jap fjalën se shumë shpejt falë popullit nuk do të ketë vetëm një institucion që është vetëm presidenti por të gjitha institucionet që janë në bulevardin Dëshmorët e Kombit do t’i kthehen popullit”, tha Meta.
