Elisa Spiropali, ministre e Shtetit për Marrëdhëniet me Parlamentin, ka reaguar në emër të qeverisë, lidhur me thirrjen e Presidentit Ilir Meta për një protestë më 2 mars, sikundër u shpreh ai kundër “grushtit të shtetit”.
Meta tha se bashkë me qytetarët, kjo protestë do të jetë “shpartallim i plotë i grushtit të shtetit përpara bulevardit me popullin shqiptar ku do lidhim një besëlidhje për të shpartalluar regjimin e oligarkëve”.
Spiropali thotë se ideja per grushtin e shtetit “ka nisur në kokën e Ilirit qysh kur nisi Reforma në Drejtësi dhe do të vazhdojë sa herë që në konsensus me SHBA/BE ne miratojmë ligje që atij i duken grushta”.
“Pyetja sot s’është pse Presidentit i ka dalë gjuha jashtë kontrollit dhe s’ka më asnjë kontroll mbi Ilir Metën. Kjo dihet. Pyetja është pse Ilir Meta priti Konferencën e Donatorëve për ta ribërë leckë Presidentin! Keqardhja për Presidentin ka sosur. Ajo për I.Metën s’ka të sosur!
Zoti e ndihmoftë Ilir Metën se Presidentin s’e ndihmon dot më as Luli!”, shkruan në rrjet ministrja e Ramës.
