Kryeministri Edi Rama pranon se idea e mini-Shengenit nuk mbështetet nga Bashkimi Europian, ndërsa u shpreh se ngatërrestarët nuk janë vetëm në Ballkan, por edhe në Europë, BE, KE, KiE.
Këtë qëndrim Rama e shfaqi në fjalën e mbajtur pas tryezës së organizuar nga Presidenti i Këshillit Evropian, Charles Michel, në Bruksel. Pavarësisht se ka shprehur besim për mbështetjen që do të ketë kjo nismë, e cila sipas tij bazohet në 4 liritë e BE-së, Rama ka pohuar përherë të parë divergjencat apo qëndrimet e ndryshme edhe brenda BE-së lidhur me të.
Nisma e mini-Shengenit është kundërshtuar nga aktorë dhe faktorë politikë në Shqipëri dhe Kosovë, që e kanë trajtuar si një ide që i shërben Beogradit.
“Unë jam i bindur që, më herët se vonë, BE, KE do ta mbështesin patjetër këtë vizion se s’ka si të ndodhë ndryshe derisa është një vizion që merr spunto nga 4 liritë e vetë Bashkimit Europian, por, sigurisht, që do të na duhet që të kemi pak durim, sepse ngatërrestarët nuk janë vetëm në Ballkan, janë edhe në Europë, kudo, kështu që, ndërkohë që BE, KiE, KE kanë shumë probleme të tjera dhe kanë shumë e shumë halle të tjera, kështu që derisa të kenë plotësisht fokus mbi këtë që ne duam të bëjmë.
Jam i bindur që gjithçka do të kthjellohet dhe pastaj jo vetëm që BE do ta mbështesë fuqimisht, por kam bindjen që vendet do vlerësohen edhe në bazë të qasjes dhe kapaciteteve për të jetësuar hapësirën europiane brenda perimetrit të Shengenit rajonal”, u shpreh ai.
Mini-Shengeni Ballkanik nisi me serinë e takimeve në Nosi Sad, për të vijuar në Ohër dhe Tiranë. Ajo që ka tërhequr vëmendjen është fakti se të tre takimet e mini-Shengenit kanë përkuar me vizitat e Alex Soros në Novi Sad, Ohër dhe Tiranë.
