Presidentja e Komisionit Europian Ursula von Der Leyen u shpreh sot në konferencën e përbashkët me Kryeministrin Edi Rama se Shqipëria do të ngrihet nga hiri i tërmetit, do të ngrihet më e fortë dhe më e sigurt në zemër të familjes tonë evropiane.
Ajo tha se tërmeti i goditi shqiptarët në gjumë dhe tani është koha që të ndihmohet Shqipëria.
Presidentja e KE-së lajmëroi se Shqipërisë do ti jepet 100 milionë euro, përveç 15 milionë që janë dhënë në muajin dhjetor.
“Kjo është një histori humbje, por edhe një histori heronjsh, një solidaritet mes shqiptarëve dhe evropianëve. Brenda disa orësh ekipet e shpëtimit mbërritën në Shqipëri. Menjëherë aktivizuam mekanizmin e mbrojtjes civile evropiane. Ekspertët tanë mbërritën në Shqipëri për të vlerësuar dëmtimet. E gjithë BE u mobilizua për një vend që është në zemër të Europës dhe që një ditë besoj se do jetë në BE”, u shpreh Presidentja e Komisionit Europian.
Në vijim ajo theksoi se solidariteti nuk ka ardhur vetëm nga BE, pasi me pjesëmarrjen në Konferencën e Donatorëve tregohet reagimi i fortë i komunitetit ndërkombëtar.
“E gjithë Bota është mobilizuar, ne kemi parë ekipe shpëtimi serbe dhe kosovare që kanë punuar. I gjithë Ballkani është bashkuar në solidaritet dhe solidariteti shpëton jetë.
Mijëra shtëpi duhen rindërtuar, shkolla dhe spitale duhen restauruar, biznese janë shkatërruar. Kostoja është vlerësuar 1 mld euro. Shqipëria e vetme nuk mund ta përballojë këtë barrë, ndaj sot ne i premtojmë popullit shqiptar se jemi aty për një kohë të gjatë, solidariteti do të jetë po aq i fortë sa ishte në orët e para pas tërmetit.
Askush nuk mund ta plotësojë boshllëkun e atyre që kanë humbur, por ne mund ta ndihmojë Shqipërinë ta fillojë nga e para. Bashkë mund ta bëjmë vendin tuaj më të fortë sesa ishte më parë. Në muajt që do të vijnë do të punojmë së bashku, do të sigurojmë që angazhimet tona të plotësohen plotësisht në kohë dhe që investimet tona të kenë ndikim në terren, në transparencë të plotë dhe llogaridhënie.
Shqipëria do të ngrihet nga hiri i tërmetit, do të ngrihet më e fortë dhe më e sigurt në zemër të familjes tonë evropiane”, u shpreh Ursula von Der Leyen.
