Ish-deputeti i Partisë Demokratike, Tritan Shehu, përmes një postimi në rrjet denoncon atë që po ndodh me sallat e urgjencës në spitalin më të madh në vend.
Shehu denoncon se nesër Rilindja ka vendosur të bëjë një hap tjetër shkatërrues, mbylljen e dy sallave të saj kirurgjikale e kalimin e rasteve në bllokun me 7 salla, ku përveç të tjerave nuk është planifikuar sallë septike, sepse te tilla janë ato që duan t’i mbyllin.
Në vijim, ish-deputeti shprehet se meqë këtu nuk kemi të bëjmë me një “jorgan” dhe as me “fillimin e botës” siç mendojnë rilindasit, dikush duhet te përgjigjet për çfarë po ndodh aty me paratë publike e cilësinë e shërbimit.
Postimi nga Tritan Shehu
“Më 2012 filloi aty punën Urgjenca Polivalente me dy salla operacioni, dhoma “të kuqe”, shtretër, pritje, etj, një arritje që në një unitet me shërbimet si laboratori, imazheria, reanimacioni etj kërkoi një investim 15 milion euro, por që:
1-Më tej u “hodh në erë” koncepti i asaj Urgjence Unike Polivalente duke e ndarë në Medikale e Kirurgjikale e vendosjen e “zinxhirëve dyerve a ashensorëve”, me pasojë dëmtimin e shërbimit ndaj të sëmurit, rritjen e koston, vështirësuar punën.
2-Nesër Rilindja ka vendosur të bëjë një hap tjetër shkatërrues, mbylljen e dy sallave të saj kirurgjikale e kalimin e rasteve në bllokun me 7 salla, ku përveç të tjerave nuk është planifikuar sallë septike, sepse te tilla janë ato që duan t’i mbyllin.
3-Hapi tretë asgjësues do të jetë shpërbërja e Urgjencës duke kaluar pjesë të saj në godinen e Sëmundjeve të Brendshme në ndërtim, me arsyen se ajo qenka “më afër rrugës”, sikur eksistuesja të jetë ”mbrapa Malit të Dajtit”, kur kështu po e largojnë nga duhet të jetë më afër.
Këto arsyetime absurde jo vetëm po ”djegin” një investim të madh, por dhe shpërbëjnë ansamblin mbi të cilën është ndërtuar ajo Urgjencë, unitetin e saj, e largojnë nga imazheria, laboratori, blloku kirurgjikal (dhe ky në shkatërrim), reanimacioni etj, duke ç’bërë edhe strategjinë e zhvillimit të QSUT.
Meqë këtu nuk kemi të bëjmë me një “jorgan” dhe as me “fillimin e botes” siç mendojnë rilindasit, dikush duhet te përgjigjet për çfarë po ndodh aty me paratë publike e cilësinë e shërbimit.
