Derbi i së dielës midis Interit dhe Milanit do të kalojë numrin e 75 mijë spektatorëve. Mediat italiane shkruajnë se supersfida e së dielës mes kuqezinjve dhe zikaltërve do të ndiqet nga një numër shumë i madh tifozësh.
Në krahasim me derbin e parë të këtij sezoni, ku ishin të pranishëm në “San Siro” rreth 70 mijë tifozë, këtë herë interesimi i tifozëve është më i madh. Ndërkohë, raportohet se kanë mbetur edhe pak bileta për t’u shitur.
Megjithatë, përpara kësaj të diele, Interi do të ketë një tjetër sfidë tepër të nxehtë me Napolin në “San Paolo” dhe besohet se stadiumi i napolitanëve do të jetë i tejmbushur.
Derbi i së dielës mes Interit dhe Milanit do të jetë takimi i pestë në këtë sezon që ndiqet nga më shumë se 70 mijë tifozë duke rritur ndjeshëm të ardhurat në arkën e klubit zikaltër.
