Kreu i Partisë Demokratike Lulzim Basha, në vijim të turit “Rrugëtimi për Shqipërinë”, deklaroi nga Devolli se Shqipëria ka bërë hapa pas. Gjatë takimit me qytetarë dhe fermerë të zonës, kreu i PD u shpreh se fermerët janë lënë në harresë nga qeveria. Sipas tij, Rama financon propagandën me paratë e marra nga qytetarët. Zgjidhja e vetme për të dalë nga kriza, janë zgjedhjet e lira, deklaroi basha.
“Për Edi Ramën është jetike kapja e drejtësisë. Vendi është zhytur në paligjshmëri. Zgjidhja e vetme për ta nxjerrë vendin nga kjo gjendje janë zgjedhjet e lira parlamentare dhe vendore. E gjithë Shqipëria punon për një kalçeto me oligarkë të Edi Ramës”-deklaroi Basha.
Më tej, lideri demokrat u shpreh kostot e rënduara e kanë bërë punën e fermerëve të pavlerë në treg dhe nënvizoi se Shqipëria është i vetmi vend në Ballkan që nuk i mbështet fermerët me financime.
“Mbështetja për fermerët sa vjen dhe ulet. Potenciali është i jashtëzakonshëm, por ju mungon një qeveri që ju mbështet. Ne kemi një qeveri që ju rëndon me politika abuzive duke e renditur vendin në vendin e tretë më të korruptuar të botës. Edi Rama hyri në histori për rekordin e korrupsionit”-deklaroi Basha.
