Arta Vorpsi, këshilltare ligjore në Gjykatën Kushtetuese, por që nga KED dhe Rilindja, konsiderohet si anëtare e re e kësaj gjykate, i është drejtuar me një kërkesë 4 anëtarëve të Kushtetueses për t’i njohur mandatin.
Kërkesa i është drejtuar Vitores Tushës, Besnik Muçit, Elsa Toskës dhe Fjona Papajorgji, ndërkohë që me dekret të Presidentit, anëtare e Kushtetueses është edhe Marsida Xhaferllari.
Mësohet se Vorpsi kërkon nga 4 anëtarët e Kushtetueses që t’i njohin mandatin, edhe pse ajo nuk është thirrur për t’u betuar para Presidentit, por betimin e kreu para një noteri.
Burime nga Kushtetuesja bëjnë të ditur se kërkesa është marrë në shqyrtim nga 4 anëtarët e Gjykatës Kushtetuese, pasi Xhaferllari nuk ka marrë pjesë në mbledhje. Por nuk është marrë asnjë vendim lidhur me rasti në fjalë pasi ka një ndarje dy me dy lidhur me kërkesën. Gjithsesi burimet sqarojnë se kërkesa e paraqitur nga Vorpsi ligjërisht konsiderohet e rrëzuar.
Kushtetuta parashikon që anëtari i Gjykatës Kushtetuese betohet para Presidentit. Vorpsi renditej e para në listën e KED, e cila i dha mandatin përmes një mekanizmi zhbllokues, me pretendimin se Presidentit i kishte mbaruar afati dhe nuk ishte shprehur.
Në anën tjetër Presidenca, ka sqaruar se i takonte Kuvendit të plotësonte vakancën për vendet që i takojnë në Kushtetuese, pasi procedura e ka të përcaktuar se vakanta plotësohen 1 nga Presidenti, 1 nga Parlamenti dhe 1 nga Gjykata Kushtetuese.
