Ambasada e SHBA në Tiranë ka reaguar mbrëmjen e djeshme me një deklaratë lidhur me protestën e opozitës.
Ndër të tjera, Ambasada dënon aktet e dhunës, dhe apelon për dialog.
“Ambasada e SHBA dënon dhunën që ndodhi gjatë protestës sonte. Grumbullimi paqësor dhe e drejta për të shprehur pakënaqësitë ndaj qeverisë janë shtylla të demokracive të shëndosha, por janë të drejta që duhen ushtruar paqësisht. Përdorimi i mjeteve piroteknike, sidomos kur vënë në shënjestër policinë, nuk është akt paqësor, është i papranueshëm dhe jodemokratik. Iu bëjmë thirrje të gjithë organizatorëve të protestës të ndalojnë aktet e dhunshme dhe të angazhohen në dialog konstruktiv”, thuhet në reagimin e Ambasadës.
Por, me qindra qytetarë kanë reaguar pas kësaj deklarate, pjesa më e madhe e të cilave, kritikojnë Ambasadën për qëndrimin e mbajtur.
Madje, një pjesë e komenteve janë ironizues, ku shtrohet pyetja se kush e administron faqen në rrjet të ambasadës: Edi Rama apo Endri Fuga.
E ndërsa, 1 vit më parë konsiderohej si herezi kritika ndaj ambasadës amerikane, tashmë kjo tabu është thyer, dhe duket se për këtë ka kontribut edhe vetë qëndrimi i mbajtur nga ambasadorët apo të dërguarit me punë, që herë pas here shfaqen në krah të qeverisë, madje edhe atëherë kur nga vetë DASH janë publikuar raporte mbi situatën në Shqipëri, krejtësisht të kundërta me ato që ambasada përpiqet të paraqesë.
