Opozita ka protestuar sërisht sot para Kuvendit dhe më pas protesta është zhvendosur para Kryeministrisë, duke kërkuar dorëheqjen e Edi Ramës.
Nën thirrjet “Rama ik”, protestuesit kanë hedhur edhe shashka, ndërsa policia u ka bërë thirrje organizatorëve të protestës që të marrin masat për të larguar personat me maska, ose që e kanë mbuluar fytyrën me shall.
“Ruani gjakftosinë. Ruani qetesinë. Mos hidhni kapsolla në drejtim të punonjësve të policisë.
Mos u përplasni me punonjësit e policisë.
Të nderuar organizatorë të protestës.
Merrni masa të menjëhershme që protestuesit që kanë mbuluar fytyrën me shall e maska ose të zbulojnë fytyrën ose t’i largoni menjëherë nga protesta.
Sipas ligjit për tubimet mbulimi i fytyrës dënohet deri në 6 muaj burg.
Ju si organizatore të tubimit mbani përgjegjësi ligjore për mbarëvajten e tubimit”, ishte thirrja e policisë.
Në fakt sipas pjesëmarrësve në këtë protestë, një prej personave që kishte vendosur kapuç dhe u përzu nga protestuesit ishte i infiltruar dhe provokonte përplasjen me policinë.
