Nga Boldnews.al
Dhjetë ditët e ardhshme janë vendimtare për Operacionin Ndërkombëtar të Monitorimit për të dëshmuar nëse është vërtetë “gardian” i Vetingut në Shqipëri apo janë thjesht dëshmitarë të procesit të zhurmshëm politike e ligjor në vendin tonë.
Pak ditë më parë, Komisioni i Pavarur i Kualifikimit (KPK) zbardhi vendimin e konfirmimit në detyrë të drejtueses së Prokurorisë për Krime të Rënda, Donika Prela.
Vendimi, në tërësinë e tij, karakterizohej nga fryma “dashamirëse” e Komisionit të Vetingut për të justifikuar pasuritë e dyshimta të prokurores Prela. Një vend të zgjeruar në vendimin e KPK zinte justifikimi i të ardhurave të paligjshme të bashkëshortit të prokurores, Vangjel Prela.
Pikërisht, për këtë aspekt të pasurisë së Prelës, ngriti pikëpyetje edhe vëzhguesi i ONM, Teo Jacobs, gjatë seancës dëgjimore, të zhvilluar me prokuroren, në fillim të Shkurtit 2019.
Por, përtej qëndrimeve dyshuese në seancë, deri më tani, as z. Jacobs dhe as trupa e ONM nuk kanë rekomanduar shkarkimin e saj nga detyra.
Në një komunikim zyrtar me “Boldnews.al” rreth 3 javë më parë, Operacioni Ndërkombëtar i Monitorimit deklaroi se “sapo të depozitohet një vendim, Vëzhguesit Ndërkombëtarë do ta rishikojnë atë dhe do të vendosin për veprimet e mundshme në anën e IMO-s (dmth nëse do të lëshojë ose jo një rekomandim për Komisionerin Publik që të marrë në shqyrtim marrjen e një apeli)”.
Tashmë që është zbardhur vendimi për Donika Prelën, është radha e ONM dhe e vëzhguesit Jacobs, në veçanti, për të vlerësuar nëse duhet të reagojnë ose jo.
Procesi i Vetingut ndaj Donika Prelës u shoqërua me dyshime të shumta për favorizimin e saj nga ana e Komisionit të Pavarur të Kualifikimit. Opozita e konsideroi “të korruptuar politikisht” nga maxhoranca socialiste procesin, në të cilin drejtuesja e Krimeve të Rënda mori ‘dritën jeshile” për të vijuar karrierën.
Një seri e gjatë dokumentesh të publikuar në media, por kryesisht në “Boldnews.al” dëshmuan se Donika Prela kishte probleme të theksuara me pasuritë e saj, si edhe me integritetin profesional.
Por, në vendimin e zbardhur, KPK ishte kujdesur që të rrëzonte të gjithë gjetjet e medias, pavarësisht se në çdo rast ishin shoqëruar me dokumenta që kompromentonin pozitën e prokurores Donika Prela.
Komisioni i Pavarur i Kualifikimit zbardhi më 27 Mars 2019 vendimin e konfirmimit të Donika Prelës. Në bazë të ligjit për Vetingun, ONM dhe Komisioneri Publik kanë mundësinë për të kundërshtuar vendimin e KPK brenda 15 ditëve nga zbardhja e tij.
Pra, monitoruesit ndërkombëtarë, nëse vlerësojnë se Donika Prela duhet shkarkuar nga detyra, kanë shumë pak kohë për të bërë rekomandimin e tyre. Afati maksimal që ka Komisioneri Publik ka për ankimin e mundshëm të vendimit për Donika Prelën është data 12 Prill 2019.
Deri më tani, ONM ka lëshuar 7 rekomandime për shkarkimin nga detyra të gjyqtarëve dhe prokurorëve, të konfirmuar në detyrë nga shkalla e parë e Vetingut.
Në çdo rast, të paktën deri më tani, Komisioneri Publik i ka marrë në konsideratë rekomandimet e trupës së vëzhguesve ndërkombëtarë dhe ka ankimuar vendimin e konfirmimit në detyrë sipas sugjerimeve të ONM-së.
