Kryeministri Edi Rama, nga foltorja e Kuvendit, tha se ajo që po ndodh nuk është një protestë popullore, po është një reagim brenda pallatit të politikës nga ajo pjesë e tërësisë së përfaqësisë së popullit shqiptar që nuk pati sensin e orientimit.
Rama tha se kjo që po ndodh është vijimi i një rruge pa krye, ku e vetmja gjë e re është një vendim politik vetëvrasës, si rezultat i humbjes së plotë të shikimit.
“Jemi në kushtet e një seriali të ri”, tha Rama, duke sjellë në vëmendje protestën e dy viteve më parë të opozitës, e cila ngriti çadrën para godinës së Qeverisë.
Rama tha se në këtë sallë ishin një grusht njerëzish pa ide, pa program dhe pa përgjegjësi. Sipas tij, opozita në këtë sallë, na tërhoqi në batakun e saj, dhe shpeshherë u degradua në situata të papranueshme.
Sipas tij, mandati ynë nuk është letër bixhozi, ne me mendatin tonë nuk luajmë bixhoz.
“Nuk është e rastit që një drejtor i lojrave të fatit, ishte atje në protestë. Por në fund të ditës është sjellja e tyre dhe lëvizja e tyre nuk i bën asgjë shumicës qeverisëse. Nëse ka një zonë që nuk preket nga destruktiviteti është kjo zonë, por preket Shqipëria. E tha bukur Saimir Pirgu, sepse njerëzit nuk kanë kohë për të kuptuar më thellë, kur shikojnë gomat e djegura”, tha Rama.
Kreu i Qeverisë theksoi se opozitës iu vunë në dispozicion të gjitha ato që kërkoi para zgjedhjeve të 25 qershorit 2017, duke i dhënë gjithçka që kërkuan.
Rama në fjalën e tij iu rikthye zgjedhjeve të 25 qershorit, duke vënë theksin në atë që për herë të parë Kolegji Zgjedhor ngeli pa punë, pasi nuk pati asnjë ankesë.
“Dy kërkesa kishim: mos shahej në gjuhë të huaj dhe të pranohej rezultati nga humbësi”, tha Rama. Sipas tij, askush nuk kundërshtoi rezultatin e zgjedhjeve dhe asnjë nga komisiorët e opozitës nuk shprehu rezerva.
