Policia e Shtetit nuk i ka dhënë leje opozitës për të zhvilluar protestën e rradhës në datën 5 mars, para Kuvendit të Shqipërisë.
Opozita ka njoftuar policinë për zhvillimin e protestës, e cila përkon me mbajtjen e seancës në Kuvend, por përgjigjia e marrë është negative.
“Protesta para Kuvendit pengon hyrjen e ligjvënësve në Parlament dhe rrezikon jetën e tyre”, thuhet ndër të tjera në përgjigjen refuzuese që policia i ka drejtuar Partisë Demokratike, më e madhja në opozitë.
Sipas kësaj shkrese, në protestën e fundit, deputetët u penguan të hyjnë në mjediset e Kuvendit, ndërsa pati akte dhune ndaj forcave të policisë. Gjithashtu pretendohet se nga organizatorët e protestës pati thirrje për akte dhune.
Referuar këtyre arsyejeve, policia ka refuzuar lejen për protestën e datës 5 mars.
“Zhvillimi i tubimit të kërkuar nga subjekti Partia Demokratike e Shqipërisë, në vendin rruga ‘George W. Bush’, Shëtitorja ‘Murat Toptani’ (Pedonale), Lulishtja përpara sallës së seancave plenare të Kuvendit të Shqipërisë, Sheshi ‘Fan S. Noli’ cenon sigurinë e Institucionit të Rëndësisë së veçantë, Kuvendi i Shqipërisë, pengon hyrjet dhe daljet e anëtarëve të qeverisë, deputetëve, administratës si dhe rrezikon jetën e tyre, pengon veprimtarinë e ligjshme të Kuvendit, pasi më datë 5.3.2019 ora 10:00 do të zhvillohet seancë plenare, sa më sipër;
Vendosa: Në zbatim të germës ‘a’ të nenit 6 të Ligjit Nr. 8773, datë 23.04.2001 ‘për tubimet’, të ndaloj zhvillimin e tubimit të kërkuar nga ana Juaj në datën 05.03.2019, ora 9:00, në vendin e përcaktuar në kërkesë.
Drejtoria Vendore e Policisë Tiranë, kërkon mirëkuptimin tuaj, për zhvillimin e një tubimi të qetë e normal në një vend tjetër të përshtatshëm pa cenuar rendin dhe duke zbatuar kërkesat e Ligjit nr.8773, datë 23.04.2001, datë 23.04.2001 ‘Për tubimet’.
Ju rikujtojmë se për veprime në kundërshtim me ligjin, organizatori, drejtues i tubimit dhe pjesëmarrësi në tubim, do të mbajnë përgjegjësi administrative dhe penale bazuar në Ligjin nr.8773, datë 23.04.2001 ‘Për tubimet’”, thuhet në shkresën e policisë.
Por, PD në një përgjigje akuzon policinë se po shkel ligjin për tubimet. Sipas opozitës, policia ka përgjegjësi të garantojë zhvillimin e tubimeve dhe jo të japë ose jo leje. PD thekson se protesta do të zhvillohet dhe nuk presin leje nga policia, e cila po shkel Kushtetutën.
Sipas opozitës, policia po përdoret politikisht, çka do të thotë se kjo është një arsye shtesë për të protestuar.
Opozita në përgjigjen drejtuar policisë hedh poshtë pretendimet se gjatë protestës së 26 shkurtit janë plagosur efektivë të policisë apo janë dëmtuar deputetë.
Ndërkohë që protesta do të mbahet para Kuvendit, nuk dihet se kur ajo do të nisë, pasi gjithçka do të varet nga koha kur Kuvendi do të mblidhet në seancë plenare.
Ndërkohë në seancën e 26 shkurtit, disa mijëra qytetarë u mblodhen duke rrethuar Kuvendin e Shqipërisë, dhe tentuan të pengojnë hyrjen e disa prej deputetëve socialistë në seancë plenare. Policia sulmoi me gaz protestuesit, duke shkaktuar probleme të renda jo vetëm te pjesëmarrësit në këtë tubim, por edhe te shumë qytetarë që ndodheshin pranë zonës ku zhvillohej protesta. Policia përmes një letre drejtuar bizneseve të zonës I kërkoi falje të dëmtuarve.