Mbledhja e Komisionit të Posaçëm për Reformën Zgjedhore është shtyrë këtë të mërkurë, për shkak të mungesës së Drejtorit të Përgjithshëm të Policisë së Shtetit, Skënder Hita në seancën dëgjimore.
Në vend të tij mori pjesë zëvendësdrejtori i Policisë së Shtetit, Sokol Bizhga, por prania e tij u kundërshtua nga përfaqësuesit e opozitës, të cilët kërkuan që në komision të raportonte vetë drejtori i Policisë.
“Është dokumentuar edhe nga ndërkombëtarët që Policia e Shtetit ka ndërhyrë në mënyrë të dhunshme në procesin e zgjedhjeve. Policia është rikthyer problem për dy arsye: për atë që duhet të bëjë dhe nuk e bën,” u shpreh bashkëkryetari i komisionit nga opozita, Oerd Bylykbashi.
“Nuk duhet të jetë këtu zv/drejtori. Komisioni nuk është seminar. Si mund të vijë një zv/drejtor, madje edhe pa staf? Mbledhja duhet shtyrë,” deklaroi Gent Strazimiri.
Nga ana tjetër, bashkëkryetari i komisionit nga mazhoranca, Damian Gjiknuri, argumentoi se drejtori i Policisë nuk ka detyrim ligjor të raportojë në Komisionin për Reformën Zgjedhore.
“Ai nuk ka detyrim për të raportuar këtu. Raportojnë në Komisionin e Sigurisë apo komisione të tjera. Ne nuk jemi komision hetimor”, u shpreh Gjiknuri.
Pas debatit mes palëve, u vendos që mbledhja e Komisionit për Reformën Zgjedhore të shtyhet.
