Kur do flasim, ishte ftesa që Kryeministri Edi Rama i drejtoi nga Samiti i Diasporës kreut të opozitës, Lulzim Basha.
Ndërkohë kësaj ftese, nëse mund të konsiderohet e tillë, i është përgjigjur Sekretari për Çështjet Ligjore në PD, Çlirim Gjata.
I ftuar në Ora News, Gjata i la takim Ramës me 16 mars, në protestën kombëtare të opozitës.
“Shkurt, prerë dhe egër, nuk ka negociata dhe nuk ka marrëveshje me Edi Ramën. Megjithatë meqenëse qenka i dëshiruar për të folur me 16 mars do të vijmë bashkë me 200 mijë shqiptarë përpara Kryeministrisë të cilët një nga një kanë diçka për ti thënë. Le të dalë aty dhe të flasë me 200 mijë shqiptarë meqenëse dashka për të folur, 16 mars ora 11:00”, tha Gjata, sipas të cilit Rama nuk mund të krijojë një opozitë artificiale në Kuvend.
Në vijim ai shtoi se ata që do të hyjnë në Kuvend, mund ti shërbejnë për të tundur peshqirin si boksierit për tu freskuar meqenëse ai kërkon të na lodhë por a vlejnë si varkë shpëtimi këto 7 apo 17 persona?
“Po flasim politikisht, a mund të sajohet një opozitë, a mund të ekzistojë një opozitë e pavotuar, a mund të krijohet? Opozita është nocion dhe akt politikk, duhet të vijë natyrshëm e votuar nga populli.
Ata që i ka votuar populli lanë letrën në derë dhe ikën dhe u bashkuan me qytetarët. Nuk ka më opozitë, nuk ka më ndërmjetës me popullin, tani ka qeveria punë me popullin. Mendoni se këta 7 apo 17 kanë shpatulla për të mbajtur opozitën? Do ti thonë popullit mos dilni në rrugë se këtu jemi ne? E kush e çan kokën për ta?! Nuk është zgjidhje kjo. Është kaq i lodhur një njeri që merret me gjëra të tilla. Është në mbarim të mandatit të tij politik njëherë e përgjithmonë”, tha ai.
