Ambasadorët në Tiranë janë angazhuar në takime formale dhe informale me zyrtarë, deputetë dhe drejtues të partive, ndërkohë që pritet që ligjvënësit e opozitës të zyrtarizojnë djegien e mandateve, apo dorëzimin e tyre.
Përveç deklaratave publike, diplomatët po zhvillojnë takime të veçanta qoftë me liderë të opozitës ashtu edhe me Kryeministrin Rama, në një përpjekje për të ulur palët në bisedime, negociata apo për bashkëpunim.
Kështu mbrëmjen e djeshme, Ambasadorë dhe përfaqësues të Trupit Diplomatik janë takuar me Kryeministrin Rama, ndërsa më pas takimit i është bashkuar edhe Gramoz Ruçi, kryetar i Kuvendit.
Pak përpara këtij takimi, Ambasadori i Britanisë së Madhe, takoi kreun e PD-së, Lulzim Basha.
Duket se tani është faza kur diplomatët po mbledhin informacionet, po ushtrojnë presione për të parë vendosmërinë e palëve politike, dhe pse jo ofrimin e një pakete zgjidhjeje.
Deri më tani publikisht lidhur me djegien e mandateve kanë reaguar Delegacioni i BE-së në Tiranë dhe Ambasada e SHBA, ndërsa nuk ka një reagim nga të tjerë Ambasadorë, përfshi këtu edhe të Gjermanisë.
Referuar deklaratës së bërë publike nga Ambasada e SHBA, ajo që vihet re është se është përdorur e njëjta gjuhë dhe pothuajse i njëjti skenar si në rastin e reformës në drejtësi, ku i kërkohet deputetëve në mënyrë individuale të mos dorëzojnë mandatet. Edhe para dy vitesh skenari ishte i njëjtë, deputetëve u kërkohej në mënyrë individuale që të merrnin pjesë në Parlament dhe të votonin pro reformës.
Tashmë që opozita ka marrë një vendim dhe në mënyrë të përsëritur është deklaruar se nuk do të ketë kthim pas, ajo që pritet të ndodhë është që diplomatët e atashuar në Tiranë, të bindin palët për bisedime apo gjetjen e zgjidhjeve që do të mund të parandalojnë një krizë politike, por edhe më gjerë.
Nuk është çudi që pavarësisht deklaratave publike, Ambasadorët të ushtrojnë presion ndaj Kryeministrit për gjetjen e një zgjidhjeje, që në rastin konkret lidhet drejtpërsëdrejti me dorëheqjen e tij nga posti qeveritar.
Zhvillimet politike në Shqipëri kanë treguar se sa herë një lider shfaqet i fortë, mospërfillës dhe përjashton çdo opsion të hedhur nga opozita, dorëhiqet ose vuan pasojat e izolimit diplomatik.
E njëjta gjë mund të ndodhë edhe me Ramën, pavarësisht se në pamje të parë duket sikur një pjesë të ambasadorëve i ka në krah. /boldnews.al/
