Kryesia e Partisë Demokratike miratoi mbrëmjen e djeshme në mënyrë unanime vendimin për djegien e mandateve të deputetëve, ndërsa pritet që vendimi të formalizohet pasditen e sotme edhe në mbledhjen e Kryesisë.
Veç këtij momenti, është diskutuar edhe mbi strategjinë që do të ndjekë në vazhdimësi opozita, ndërsa kreu demokrat Lulzim Basha ka kërkuar që komunikimi me ndërkombëtarët të bëhet përmes dakordësimit me aleatët dhe që të mos ketë përgjigje individuale për ambasadorë dhe seli diplomatike.
Referuar vendimit për djegien e mandateve, kryesia ka marrë vendimin unanim, ndërsa pothuajse të gjithë anëtarët e Kryesisë kanë marrë fjalën.
Gjithashtu anëtarë të Kryesisë së PD kërkuan që djegia e mandateve të pasohet me protesta të vazhdueshme, por edhe prezantimin e alternativës së opozitës dhe zgjidhjet që ofrohen për problematikat që ngrihen nga qytetarët.
Kreu i FRPD-së, Belind Këlliçi, kërkoi që dosjet e denoncuara publikisht nga opozita, përfshi edhe atë të njohur tashmë si ‘339’ t’I vihen në dispozicion ndërkombëtarëve.
Mësohet se Jemin Gjana, një prej anëtarëve më të vjetër të kryesisë së PD-së, e ka cilësuar si më të mirin në historinë e saj vendimin për djegien e mandateve.
Jamarbër Malltezi dhe Arben Ristani kanë vënë theksin në kriminalizimin e proçesit zgjedhor, ndërsa Enno Bozdo është shprehur për angazhimin e burimeve më të mira njerëzore dhe intelektuale në protestat dhe aksionin opozitar.
Forma e dorëzimit të mandateve do të jetë individuale dhe do të përfshijë të gjithë listën e Partisë Demokratike. Një komision i ngritur pranë PD do të përcaktojë edhe formën më të mirë të realizimit të këtij proçesi, që ndodh për herë të parë në politikën shqiptare.
