Lulzim Basha, Kryetar i Partisë Demokratike, bëri të ditur sot ndërprerjen e protestës së organizuar nga opozita, pas një rezistence 5 orëshe, të mijëra qytetarëve në bulevardin “Dëshmorët e Kombit”.
Basha i ka lënë një afat 5 ditor, Kryeministrit Edi Rama, duke paralajmëruar një tjetër protestë të enjten e javës së ardhshme.
Përgjatë gjithë kohës, Basha qëndroi përkrah protestuesve, duke dhënë një mesazh krejt tjetër nga ai i parë deri më tani, kur zakonisht liderat politikë, largohen nga protesta duke lënë turmat të përballen me forcat e rendit.
Për mbi 4 herë, Basha dhe deputetë të tjerë të opozitës, u përballën ashtu si qindra qytetarë, me pasojat e gazit lotsjellës, për të cilin efektivët e Gardës u treguan dorëlëshuar.
Këtë sasi gazi të përdorur nga policia dhe garda e drejtuar nga Sander Llesaj, nuk e kanë përdorur as trupat e sigurisë së diktaturës kur drejtoheshin nga Hekuran Isai apo Gramoz Ruçi për të mbrojtur regjimin diktatorial në protestat e vitit 1991.
Por çfarë ndodhi sot që opozita u tërhoq nga protesta për të cilën më parë ishte thënë se do të kishte rezistencë deri në rrëzimin e qeverisë?
Ndoshta në lojë kanë hyrë ndërkombëtarët, që në raste të tilla janë shumë të vëmendshëm dhe tentojnë gjithmonë të ulin tensionet.
Në kushtet kur nga opozita po ushtrohej presion përballë një Kryeministri që më tepër është mërzitur për këpurdhën që u dëmtua, sesa për dhjetra qytetarë dhe efektivë policie të dëmtuar nga gazi lotsjellës i lëshuar nga Garda e Republikës, nuk përjashtohet mundësia që diplomat të akredituar në Tiranë, të kenë luajtur rolin e ndërmjetësit, duke i lënë kohë palëve të gjejnë një zgjidhje politike.
Situata duket se ka hyrë në një lojë nervash, ku një nga palët do të lëshojë terren. Me shumë gjasa mund të jetë Kryeministri që të pranojë një tërheqje të butë, duke shmangur një tjetër përballje deri të enjten e javës së ardhshme.
Deri atëherë, mund të jenë ndërkombëtarët që mund të ushtrojnë presionin për gjetjen e një zgjidhjeje, e cila do të ç’tensionojë situatën dhe pse jo të shmangë një skenar që mund të nisë me djegien e mandateve të opozitës dhe të çojë në protesta të vazhdueshme deri në rrëzimin e Ramës. /boldnews.al/
