Deputetja Valentina Leskaj i ka shkruar një letër kreut të Kuvendit, Ilir Meta se dëshiron t`i plotësojë kërkesën Partisë Demokratike për të çuar mandatin e saj në Gjykatën Kushtetuese. Opozita pak mituta më parë ka paralajmëruar se do të bojkotojë seancën parlamentare ditën e sotme dhe do të bllokojë dhe foltoren në qoftë se dy deputetët, Rakip Suli dhe Valentina Leskaj, nuk çojnë mandatin e tyre në Kushtetuese.
Edhe javën e shkuar opozita bllokoi seancën parlamentare duke kërkuar me ngulm që kërkesa e tyre ndaj mandatit të deputetes Leskaj të plotësohej. Mesa duket janë këto zhvillimet e fundit që e kanë detyruar deputeten Leskaj që t`i plotësojë kërkesën PD-së për të çuar mandatin e saj në Gjykatën Kushtetuese.
Opozita e ka akuzuar deputeten dhe nënkryetaren e Kuvendit, Valentina Leskaj se dy djemtë e saj kanë përfituar tenderin për OSHEE dhe koncesionin e hekurudhës Tiranë-Ballsh, gjë e cila sipas argumenteve të PD, përbën shkelje të ligjit për konfliktin e interesit dhe si rrjedhojë sjell humbjen e mandatit të deputetit për Leskajn. Nga ana tjetër deputetja socialiste ka deklaruar duke hedhur poshtë akuzat e opozitës se biznesi i dy djemve të saj ka nisur para se ajo të fillonte karrierën politike.
