Zbulohet emri i biznesmenit vlonjat, ndaj të cilit u organizua një atentat i dështuar me telekomandë mesnatën e së Enjtes, në zonën e Liqenit të Thatë, në Tiranë. Ai është Vasil Bedinaj, lindur më 1972, pronar i hotel “Regina” në Radhimë, si edhe i agjencisë turistike “Regina Travel”.
Boldnews.al raportoi në mëngjes se, në mjetin e tij, tip Benz” u gjet një sasi prej 450 gramë lëndë plasëse C-4, e cila nuk kishte shpërthyer për shkak të një defekti teknik tek detonatori.
Shënjestra e atentatit të dështuar, Vasil Bedinaj, ka qenë edhe kandidat i pavarur në zgjedhjet lokale për Bashkinë e Vlorës, si prurje e shoqërisë civile dhe biznesit. Gjatë fushatës elektorale, Bedinaj ka bërë publik edhe biografinë e tij, me anë e së cilës i prezantohej elektoratit vlonjat.
Sipas asaj që është publikuar prej tij, Bedinaj ka kryer studimet e larta për Drejtësi, e më pas është specializuar me master për Shkencat Juridike gjatë viteve 2008-2010. Karrierën profesionale e ka nisur që prej vitit 2003 me fokus në sektorin e hoteleri- turizmit, me resortin turistik “Hotel Regina” Radhimë-Vlorë. Aktualisht administrator i këtij resorti si edhe i agjensisë turistike “Regina Travel”. Po sipas fletë-palosjes prezantues si kandidat për Bashkinë Vlorë, Bedinaj prezantohet si një biznes me ndikim në zhvillimin ekonomik të zonës.
Prej vitit 2009, ai është kryetar i Shoqatës Së Operatorëve Turistik për Jugun e Shqiperisë “ATA”. Po ashtu, rezulton se Bedinaj është vlerësuar me cmime kombëtare e ndërkombëtare si “Albanian Exellence” dhe “Çelsi i Argjendë” .
