Kjo fundjavë duhej të dhuronte një sfidë të paharrueshme për Keidi Baren, pasi pritej të ishte protagonist në një nga duelet me të ndezur të La Liga, derbin Espanjol-Barcelona. Por me sa duket, mesfushori i përfaqësueses shqiptare mund të mungojë në këtë duel, pasi mendohet se është i infektuar me COVID.
Klubi në fakt nuk ka dhënë asnjë shpjegim, por ai mungoi në mënyrë të papritur në sfidën e të hënës që skuadra e tij humbni me shifrat 2-1 përballë Atletik Bilbaos. Mendohej se Bare do të ishte titullar, por të gjithë u çuditën kur emri i tij nuk ishte as mes të grumbulluarve.
Media të ndryshme spanjolle kanë shkruar se Bare rezulton me COVID, ndaj ka munguar në sfidën e të hënës. Por klubi nuk ka bërë ende komunikatën e zakonshme për të konfirmuar zëra të tillë duke shpjeguar se ka të infektuar në radhët e ekipit. Ndaj të gjithë presin stërvitjen e të mërkurës për të kuptuar nëse Bare do të jetë i gatshëm për duelin e fundjavës apo nëse do të konfirmohen zërat se do të mungojë për shkak të virusit.
