Kreu demokrat Lulzim Basha u shpreh sot se SPAK ndodhet nën presion dhe kjo provohet nga numri i vogël i personave që po përballen me ligjin.
Basha tha se PD ka denoncuar në SPAK zyrtarë të lartë, për të cilët ende nuk ka një përballje me ligjin.
Referuar propozimeve të PD për vettingun e politikanëve, Basha tha se SPAK duhet të kontrollojë imtësisht politikanët, mund ta nisë me 200 të parët, duke kontrolluar lidhjet e tyre me krimin apo korrupsionin. Basha vuri theksin se ky vetting duhet të nisë me Presidentin, Kryetaren e Kuvendit, Kryeministrin, ministrat, deputetët dhe kryetarët e bashkive.
Sipas tij, çdo politikan që nuk justifikon dot pasurinë e tij apo të lidhjeve të tij, duhet të largohet. Basha tha se ky eshte interesi kombëtar, është interesi i shqiptarëve, pasi i jep fund një politike ku bosët politikë janë të zhytur në luks.
“Politika duhet të pastrohet nga llumi i tranzicionit. Në politikë është futur llumi i shoqërisë, politika u kthye në një mekanizëm për tu pasuruar, duke grabitur pronat private të shqiptarëve por edhe pronat publike”, tha Basha.
Sipas tij, PD ka detyrimin moral për të pastruar politikën dhe për ti prerë lidhjet e saj me korrupsionin, krimit të organizuar dhe oligarkinë.
“Nuk është një ekspeditë ndëshkimore. Partia Socialiste duhet të dalë haptasi para shqiptarëve, të pranojë propozimet Kushtetuese, dhe ti jepet fund tranzicionit 30 vjeçar. Çdo alibi vetëm sa nxjerr zbuluar llumin e tranzicionit pvr të mbajtur peng Shqipërinë”, tha Basha.
