Nga Boldnews.al
Mazhoranca ka aktivizuar të gjithë artilerinë për zgjedhjet parlamentare të 25 prillit. Duke kontrolluar të dy pushtetet, atë qendror dhe lokal, ministrat dhe kryetarët e bashkive kanë aktivizuar të gjithë nëpunësit e tyre në zgjedhje.
Nga njëra anë në shtabe elektorale dhe nga tjetër në bërjen e procedurave tenderuese. Siç ka ndodhur rëndom në këto 30 vjet, një nga premtimet e forcave politike ka qenë “asfalti elektoral”. Fshatra dhe lagje në qytete kanë kërcënuar më parë se nuk do marrin pjesë në zgjedhje, nëse nuk u shtrohej rruga. Për t’i dalë ballë kësaj situate, Bashkia e Durrësit, në një ditë të vetme ka shpallur plot 4 tendera për rikonstruksione rrugësh. BoldNews ka siguruar dokumentet e këtyre tenderave, ku ajo që bie në sy është se në 4 tenderat e ndryshëm, vlera është e njëjtë; rreth 500 mijë euro!
Shikojini pak me vëmendje vlerën, që siç e shkruam, është e njëjtë! Megjjthëse emrat e rrugëve ndryshojnë, Bashkia e Durrësit i ka rënë për shkurt, duke ofruar të njëjtën vlerë. Por, le të hulumtojmë më tej dokumentet. Të 4 tenderat për rikonstruksionet e rrugëve “Tepelena”, “Shën Pjetër”, “Shkumbini” dhe “Danubi” kanë pothuajse të njëjtin dokument të ngarkuar në Agjencinë e Prokurimit Publik, ku vetëm emërtimi i rrugës ndryshon!
Përveç vlerës, ajo që bie në sy në këto dokumente është edhe afati i kryerjes së punimeve, që janë brenda 84 ditëve. Pra, të 4 rrugët duhet të përfundojnë brenda dy muajve e gjysmë. Por, për dy muaj e gjysëm kemi zgjedhjet parlamentare.!
Kryetarja në detyrë e Bashkisë së Durrësot, Emiriana Sako, i ka rënë për shkurt me dokumentet. Ajo i ka bërë me metodën e famshme “copy paste”, duke kërkuar rikonfirmimin në detyrë te “i madhi”. Ajo po shpejton që t’u mbushe mendjen drejtuesve poltikë që të mos ketë të njëjtin fat si paraardhësja dhe ka filluar fuqishëm fushatën elektorale. Në një ditë, ajo ka shpenzuar mbi 2 milionë euro për asfalt dhe mbushje gropash. Dhe, të gjitha dokumentet e 4 tenderave të ndryshëm të njëjtë.
Por, nuk janë vetëm dokumentet e shpalljes së njoftimit të kontratës identike! Dokumentet shoqëruese, raportet teknike, specifikimet teknike, apo edhe planet e rrugëve, janë sërish të njëjta. Madje, të hartuara nga e njëjta kompani private; ARKONSTUDIO! Kjo e fundit, siç e kemi denoncuar edhe herë të tjera, ka si pronar me 50 % të aksioneve z.Erjon Këri, kandidat i Rilindjes për deputet. Në të gjitha dokumentet, ajo që vërehet është emergjenca e Bashkisë së Durrësit për të shtruar asfaltin në këto rrugë. Dhe, e gjitha, para zgjedhjeve të 25 prillit.
Në një tjetër tender, vartësit e Sakos kanë kërkuar blerjen e materialeve inerte për mirëmbajtje rrugë rurale dhe urbane për vitin 2021. Nëse në 4 rrugët e mësipërme do të shtrohej asfalt elektoral, në dhjetëra rrugë të tjera në Durrës do të hidhet zhavorr apo do të mbushen gropat.
