Ministrja e Shëndetësisë, Ogerta Manastirliu, iu drejtua me një thirrje të gjithë qytetarëve në këtë kohë pandemie, që të mos shkojnë vonë në spitale.
Nga foltorja e Kuvendit, Manastirliu tha se nuk duhet të shkojnë vonë në spitale në rast se konstatojnë se janë të prekur pasi ata që i këshillojnë për diçka të tillë nuk mendojnë për të mirën e tyre por për pushtetin. Në fakt këshillat qytetarëve për t´u shtruar ose jo në spital, për të marrë një medikament apo një tjetër ua japin mjekët, dhe bazuar në organizimin që vetë Ministria ka bërë, janë mjekët e familjes.
Atëherë lind pyetja: kush i këshillon qytetarët e prekur nga koronavirusi për të shkuar shpejt apo vonë në spitale?
Pamjet e transmetuara në media tregojnë me dhjetra raste kur qytetarët rrijnë në pritje në ambulanca, atje ku trajtohen, ndërsa denoncimet janë bërë nga mjekë të Urgjencave apo spitaleve Covid-19.
“Më lejoni të bëj një parashtrim të situatës së epidemisë Covid në vendin tonë duke prezantuar masat e marra deri më sot dhe duke vënë përpara një ekspoze të punës sonë dhe për muajt e vështirë për të cilët po përgatitemi. Do kisha dalë paera jush si ministre e shëndetësisë në kohë paqjeje. Kjo pandemi nuk e gjeti shëndetësinë në grahmat e fundit ashtu si ishte në vitin 2013. Në çdo fazë të kësaj pandemie kemi ecur sipas strategjive të hartuar nga ekspertët më të mirë në vend.
Mos ejani vonë në spitale. Mos dëgjoni ata që thonë se nuk ka shtretër dhe mjekët nuk iu shërbejnë. Nuk e bëjnë për ju. E bëjnë për pushtetin e tyre. Është koha për të besuar ekspertët dhe mjekët. Ajo që na duhet në këto momente është solidariteti, zbatimi i rregullave, ruajtja e distancës dhe higjienës”, tha ministrja.
