Nëntë persona janë arrestuar në Tiranë, për vepra të ndryshme penale, dy prej tyre, të shpallur në kërkim.
Njoftohet se në flagrancë janë arrestuar në ambientet e një hoteli në rrugën “Artan Lenja”, I. Gj., 19 vjeç, S. Sh., 36 vjeç, A. Q., 43 vjeçe dhe A. T., 28 vjeçe. Këtyre të fundit, gjatë kontrolleve fizike, policia u ka gjetur doza kokaine dhe kanabisi që u sekuestruan në cilësinë e provës materiale.
Nga hetimet ka rezultuar se një nga personat që iu kishte sjellë lëndën narkotike ishte I. Gj.
Po ashtu, specialistët për Hetimin e Krimit në Komisariatin e Policisë Nr. 2 arrestuan E. H., 36 vjeç, pasi në rrugën “Myslym Shyri”, ka tentuar të vjedhë në një dyqan, duke e kërcënuar me një mjet lodër (pistoletë çakmak), M. K., të cilit i ka kërkuar një shumë lekësh.
Në pranga është vënë edhe një i mitur me iniciale M. K., pasi në rrugën “Besëlidhja”, në dyqanin e celularëve të A. P., ka vjedhur 15 telefona celular të cilët u sekuestruan në cilësinë e provës materiale.
U kap gjithashtu dhe u ndalua E. Z., 34 vjeç, pasi Gjykata e Posaçme të Shkallës së Parë Kundër Korrupsionit dhe Krimit të Organizuar Tiranë i ka caktuar masën e sigurisë “Arrest në burg”, për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Ndërkohë, u ndalua edhe 26-vjeçari I. L., i shpallur në kërkim për “Vjedhje”.
Specialistët e Qarkullimit Rrugor bënë arrestimin e B. K., 34 vjeç, pasi në rrugën “Konferenca e Pezës”, u kap duke drejtuar mjetin pa lejen përkatëse dhe në gjendje të dehur.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
