Një kambist në Durrës ka rënë pre e një mashtrimi të sofistikuar, duke humbur 60 mijë euro, në një rast që hetuesit e Krimit Ekonomik dyshojnë se lidhet me skemat e përsëritura të Florian Gjergjit.
Sipas hetimeve, Gjergji, i cili dyshohet se ndodhet aktualisht në Gjermani, i është prezantuar viktimës përmes mesazheve si kushëriri i një biznesmeni të njohur.
Duke shfrytëzuar lidhjet dhe njohjet ekzistuese të kambistit, ai ka arritur të fitojë besimin e tij dhe ta bindë për të kryer transaksionin. Më pas, kambistit iu kërkua t’i dorëzonte 60 mijë euro një personi pranë një qendre tregtare në Tiranë.
Pas marrjes së shumës, personi u largua drejt Elbasanit, ku sipas hetimeve u takua me një bashkëpunëtor tjetër që kishte mbërritur me taksi nga një zonë rurale.
Policia ka identifikuar dhe arrestuar dy personat e përfshirë në tërheqjen e parave. Gjatë marrjes në pyetje, ata kanë deklaruar se vepronin sipas udhëzimeve të Florian Gjergjit.
Mashtrimi u zbulua vetëm pak minuta pas dorëzimit të parave, kur kambisti kontaktoi personin që i ishte referuar si “kushëriri i biznesmenit” dhe kuptoi se kishte rënë pre e një skeme mashtruese, pasi nuk kishte ekzistuar asnjë kërkesë reale për shumën e dorëzuar.
