Mira Rakacolli, zv.ministre e Shëndetësisë, u shpreh mbrëmjen e sotme në emisionin “Tempora” se izolimi mbetet mënyra më e rëndësishme në rastet e pandemive.
Rakacolli ka shmangur komentet mbi takimet e Kryeministrit Edi Rama, kryebashkiakëve, zyrtarëve, që në salla të mbyllura nuk mbanin as maska, megjithëse çdo ditë Ministria e Shëndetësisë këshillon qytetarët për mbajtjen e maskave.
Zv.ministrja theksoi se mbajtja e maskave nuk u bë e detyrueshme, pasi iu besua ndërgjegjësimit të situatës.
“Rastet po izolohen, po gjurmohen kontaktet, po kryhen hetimet epidemiologjike, por testet nuk kryen sot për sot, duhet të kalojnë disa ditë për të parë simptomat, pasi në të kundërt testi nuk tregon pozitivitet”, tha Rakacolli.
Ajo tha se testimet janë bërë aq sa duhen për të mbajtur nën kontroll situatën.
Rakacolli tha se të gjitha shifrat e planifikuara për pandeminë kanë shkuar për këtë situatë.
“Nuk e respektuan si duhet protokollet e hapjes. Nëse në fillim shqiptarët zbatuan me përpikëmëri gjithçka që thanë ekspertët, në fazën e dytë u duk sikur gjithçka mbaroi. Ato sektorë të cilët u hapën, nuk respektuan rregullat e protokollet anti-covid.
Vatrat nuk lindën në spital, kanë rritur në vende ku nuk janë respektuar rregullat dhe masat që janë rekomanduar. Ky është fakti i rritjes së shpejtë. Duhet ta shohim këtu këtë defekt, sepse ne nuk po bëjmë atë që po kërkohet”, tha ajo.
