Autoritetet italiane kanë arrestuar një shtetas kinez të dyshuar për përfshirje në një grup hakerësh të mbështetur nga Kina, që sipas autoriteteve amerikane, kanë tentuar të vjedhin të dhëna konfidenciale mbi kërkimet për vaksinat kundër Covid-19 në kulmin e pandemisë, në vitin 2020.
Xu Zewei, 33 vjeç, u ndalua më 3 korrik në aeroportin Malpensa të Milanos, pas lëshimit të një urdhër-arresti ndërkombëtar nga Shtetet e Bashkuara, konfirmuan autoritetet italiane.
Sipas burimeve të afërta me çështjen, Xu dyshohet se ka lidhje me grupin e njohur kibernetik kinez Hafnium, që akuzohet për sulme ndaj softuerit të postës elektronike Microsoft në vitin 2021, si pjesë e një fushate masive spiunazhi. Aktakuza amerikane, që pritet të përmbajë nëntë pika akuze, e lidh Xu me sulme kibernetike ndaj kërkimeve shkencore amerikane për vaksinat kundër koronavirusit.
Xu ndodhet aktualisht në një burg afër aeroportit të Milanos dhe pritet të përballet me akuza për ndërhyrje të paligjshme në sisteme kompjuterike mes shkurtit 2020 dhe qershorit 2021. Ministria italiane e Drejtësisë ka konfirmuar se Roma ka pranuar një kërkesë zyrtare nga SHBA për ekstradimin e tij.
Departamenti amerikan i Drejtësisë nuk ka komentuar mbi rastin, ndërsa avokati mbrojtës i Xu në Itali nuk është përgjigjur ndaj kërkesave për koment. Xu ka deklaruar se është specialist në teknologjinë e informacionit.
Rasti pritet të jetë diplomatikisht delikat për qeverinë e kryeministres Giorgia Meloni, e cila ndodhet mes dy aleatëve të fuqishëm SHBA-ve dhe Kinës. Meloni ka theksuar marrëdhënien e ngushtë me presidentin amerikan Donald Trump, duke e konsideruar Uashingtonin si partnerin kryesor të Italisë, pavarësisht tensioneve mes SHBA-ve dhe BE-së.
Nga ana tjetër, ajo është përpjekur të ruajë marrëdhënie të mira me Pekinin, edhe pasi Italia vendosi të tërhiqej nga nisma kineze “Një brez, një rrugë”. Zëvendëskryeministri Matteo Salvini pritet të vizitojë Pekinin më vonë këtë javë për një vizitë zyrtare.
Gjatë pandemisë, FBI dhe Agjencia Amerikane për Siguri Kibernetike akuzuan vazhdimisht Kinën për përpjekje për të hakuar institucionet kërkimore amerikane që studionin virusin. Në vitin 2020, Departamenti i Drejtësisë i SHBA akuzoi dy shtetas të tjerë kinezë për përpjekje për të vjedhur sekrete tregtare në fushën e kërkimeve shkencore dhe teknologjike.
Pekini i ka mohuar kategorikisht akuzat amerikane, duke argumentuar se Kina ishte vetë në krye të garës globale për zhvillimin e vaksinës dhe nuk kishte nevojë për të kopjuar Perëndimin.
Italia, ndërkohë, ka një histori të ndërlikuar në trajtimin e kërkesave për ekstradim. Në fillim të janarit, një gjykatë italiane anuloi arrestimin e një inxhinieri iranian të kërkuar nga SHBA, pak ditë pasi Irani liroi një gazetare të re italiane në një shkëmbim të dyshuar të burgosurish. Po ashtu, në vitin 2023, biznesmeni rus Artem Uss, i kërkuar nga SHBA për pastrim parash dhe shmangie sanksionesh, u arratis nga arresti shtëpiak në Itali një ditë pasi gjykata miratoi ekstradimin e tij dhe më pas u shfaq në Rusi.
Qeveria Meloni fajësoi sistemin gjyqësor për këtë rast, duke kritikuar lehtësinë e trajtimit që i ishte bërë Uss.
