Analisti Andi Bushati, i ftuar në ”Top Talk”, i pyetur mbi faktin se çfarë duhet të bëjë Partia Demokratike dhe opozita, meqë kryeministri Edi Rama mund të arrijë marrëveshje me opozitën në parlament, t’i pranojë kushtet e saj për të ndryshuar sistemin, pra listat e hapura dhe në këmbim të marrë votën për heqjen e koalicioneve, Bushati tha se Rama do bëjë çdolloj akrobacie për të rritur edhe një votë.
“Në fakt ka një lloj shqetësimi nga opozita që ky po na heq koalicionet dhe shqetësimi duket i drejtë. Pse? Sepse po të bësh një llogari të thjeshtë matematikore me të njëjtat vota, 5 vota LSI-ja, 10 PD-ja po të marrin sot, po të hyjnë veç e veç marrin më pak deputetë sesa kur janë bashkë dhe kjo është një taktikë për të përçarë votën opozitare.
Këtë unë nuk e shoh si një mëkat shumë të madh, sepse tani dihet që Rama është në vështirësi, Rama do bëjë çdolloj akrobacie për të rritur edhe një votë, që nga blerja, që nga vjedhja, që nga banditët dhe që nga ndryshimet e ligjit. Kur ti thua që jam përballë një regjimi, do e lësh regjimin të bëjë taktikat e tij dhe ti do bësh taktikën tënde.
Nëse Rama voton listat e hapura unë nuk e shoh problem, sepse opozita fshin siglën e PD-së dhe LSI-së po të dojë, po të ketë qëllim shembjen e regjimit, jo të ketë karrigen e Bashës apo të Kryemadhit, bën një listë të përbashkët “Fronti Opozitar Kundër Regjimit të Edi Ramës”, ja po ua caktoj unë titullin dhe nuk humbet asnjë votë opozitare”.
