Mbi 10 mijë qytetarë, banesat e të cilëve u dëmtuan nga tërmeti i 26 nëntorit, vijojnë të jenë në çadra. Shifra u bë publike nga ministri i Rind♪7rtimit, Arben Ahmetaj, në mbledhjen e Komitetit Kombëtar të Rindërtimit.
Ndërkohë, ai tha se 12 mijë qytetarë kanë përfituar nga bonusi i qirasë.
“Rreth 357 pallate të inspektuara thellësisht, 115 janë për t’u shembur me procedurë të përshpejtuar dhe 242 për t’u rikonstruktuar. Ndërkohë janë 1523 banesa për t’u shembur.
Sa i përket shkollave janë inspektuar 79 teksa 72 janë për rikonstruksion. Shumë shpejt do të kalojmë në fazën e dytë.
Po ashtu edhe për qendrat shëndetësore. Bashkia e Tiranës është një hap mbrapa por ka filluar ‘working process’. Në të gjithë vendin janë 10023 persona ende në çadra, ndërsa 12 mijë banorë kanë përfituar bonusin e qirasë.
Me lejet e ndërtimit kemi avancuar duke dhënë 1455 me procedurë të përshpejtuar”, tha Ahmetaj.
Ministri i Rindërtimit tha se aplikimi në platformë do të jetë detyrim ligjor, pasi bën të mundur përfitimin në raport me dëmin dhe frymët në familje, qoftë në aspektin financiar apo metrave katrorë.
“Janë më shumë se 14 mijë aplikime. E filluam me 200 aplikime në ditë, arritëm në 2000.
Në portalin unik të Rindërtimit kemi të gjithë informacionin për çdo donacion, aktivitet apo veprim. Do të administrohet nga AKSHI. Organizatat të sjellin informacion që çdo gjë që ndodh në procesin e Rindërtimit të jetë në këtë website”, tha Ahmetaj.
