Drejtori i Emergjenca Civile për Tiranën, Erindi Bejko, bëri një pasqyrim të gjendjes në Tiranë, pas tërmetit të 26 nëntorit, që shkaktoi 49 të vdekur në Durrës e Thumanë, dhe disa qindra të plagosur.
Bejko iu bëri thirrje të gjithë qytetarëve që iu rrezikohen banesat që të dalin me urgjencë për të shpëtuar kokën dhe jetën e tyre.
“Duhet të fitojmë luftën psikologjike me panikun. Njerëzit janë njëlloj në panik, si kur kanë vetëm krisje, ashtu edhe kur iu janë shembur shtëpitë. Të gjithë thonë “problemi im është më i madh se i të gjithëve”. Ne nuk patëm fatin fatal, që pati Durrësi e Thumana”, tha Bejko.
Bejko tha se janë katër pallate në zonën e Kombinatit në kryeqytet të cilët janë shpallur të pabanueshëm për shkak të pasojave të tërmetit.
Sipas tij, pallatet e ndërtuara nga periudhës së regjimit komunist dhe ndërtesat private të cilat i përkasin viteve ’60-’90, janë të rrezikuara nga tërmeti.
“Pallatet janë ato të ndërtuara gjatë viteve të sistemit komunist, që ndërtoheshin me kontribut vullnetar. Ato pallate sot kanë shfaqur problemet e tyre. Ndërsa banesat private janë ndërtuar në vitet 60-90. Këto kanë probleme dhe janë bërë të pabanueshme. Jemi në inspektim edhe ndërtesa të tjera të cilat mund të përbëjnë rrezik”, shtoi Bejko.
Në vijim ai tha se është vështirë të jepen shifra zyrtare, por kemi shtëpi private në zonat rurale, 300-350 të dëmtuara.
