Kryeministri Edi Rama ka zhvilluar një takim kokë më kokë me Kreun e Kuvendit Gramoz Ruçi dhe atë të Grupit Parlamentar socialist, Taulant Balla, mëngjesin e sotëm.
Takimi është zhvilluar në zyrat e Kryesisë së Kuvendit, ndërkohë që në selinë e PS-së është thirrur një mbledhje Kryesie e kësaj partie.
Takimet zhvillohen tre ditë pasi Qeveria dështoi në hapjen e negociatave me BE-në, ndërsa zyrtarë të Rilindjes kanë përjashtuar çdo përgjegjësi lidhur me dështimin, duke drejtuar shigjetat e akuzave ndaj Presidentit francez, Emmanuel Macron, dhe vendeve skeptike.
Rama pretendon se Shqipëria ka plotësuar kushtet dhe kriteret për hapjen e negociatave. Në daljen publike pas vendimit negativ, Rama deklaroi se nuk ka ndërmend të dorëhiqet apo të çojë vendin drejt zgjedhjeve të parakohshme, ashtu sikundër veproi homologu maqedonas, Zoran Zaev.
Gjithsesi nuk përjashtohet mundësia që lëvizjet brenda Rilindjes të jenë sinjale të të tërheqjeje të Kryeministrit nga qëndrimi i prerë për të mos i hapur rrugën zgjedhjeve të parakohshme, ndërkohë që kriza politike në vend thellohet.
Në mbledhjen e Kryesisë së PS-së pritet të diskutohet lidhur me organizimin dhe zgjedhjet e brendshme në këtë parti, bazuar në kalendarin e miratuar më parë dhe afatet që i janë lënë degëve për organizimin e zgjedhjeve dhe përcaktimin e delegatëve të Kongresit.
Gjithashtu një pikë është reforma zgjedhore, por edhe 9 kushtet e shprehura përmes një dokumenti nga Bundestagu.
