Disa mijëra qytetarë nga të gjitha njësitë vendore janë nisur drejt Tiranës për të marrë pjesë në protestën e thirrur nga opozita para godinës së Kryeministrisë në bulevardin Dëshmorët e Kombit.
Nga Shkodra, Lezha, Berati, Fieri, Vlora, Gjirokastra, Korça, Pogradeci, Dibra, Elbasani dhe Durrësi, disa dhjetra autobuzë dhe automjete private, janë nisur në mënyrë të organizuar nga strukturat lokale të partive opozitare.
Ndërkohë që janë raportuar edhe incidentet e para, ku në disa qytete policia ka mbajtur shënim targat e automjeteve që bëjnë transportin e qytetarëve.
Kreu i degës së PD-së në Fier, Luan Baçi, ka denoncuar një tjetër skandal, ku sipas tij, policia ka kontaktuar disa dhjetra qytetarë të cilëve u kërkon të paraqiten në polici në orën 08:00.
